Canada ramah thalaite'n politics an ngaihven - Vanlalawmpuii Chawngthu

Mizoram State Women Commission (MSWC) chairperson Vanlalawmpuii Chawngthu, MLA chuan Canada ramah ṭhalaite'n politics an ngaihven thu a sawi.

Canada-a 13th Commonwealth Parliament Seminar-a a telnaa a thil tawnte thuthar thehdarhtute'n nimina an zawhna chhangin, Vanlalawmpuii chuan, "Parliament session-ah sikul uniform hâ ka hmu ṭhin a, zirlaite bakah chhungkuate pawhin an ngaithla a, a bik takin ṭhalaiin an ngaithla nasa hle a ni," a ti.

Vanlalawmpuii Chawngthu chuan, sorkar hnathawkte'n sorkar an zah hle tih sawiin, "Finance Committee-in sorkar hnathawk an inkohnaah kan awm a, department insawifiahna hun an insiama an inchhàl nasa hle," a ti a; sorkar hnathawkte entawn tlak a tih thu a sawi.

MSWC Chairperson chuan seminar-a an thil tih sawiin, "Women in politics in our country' tih thupui hmangin kan sawiho a, quota tel loin anni chuan ram hruaitu an thlang tlangpui a, anni ramah chuan ram hruaitu 50% vel hmei-chhia an ni. Tuna hmeichhe tana India rama reservation neih ṭhin
a ni hi an hrethiam lo hle," a ti.

Vanlalawmpuii chuan, Canada Parliament session an awm laiin an inhnial nasa hle tih sawiin, ISIS bei turin sipai tam zawk lak belh an rawt a, mahse, an puitlin tak loh thu a sawi.

13th Commonwealth Parliament Seminar-ah hian Vanlalawmpuii Chawngthu hi India aiawha palai kal pahnih zingah a tel a, seminar-ah hian Commonwealth ram aṭangin mi 20 an tel a ni.