Hmingdailova'n Mission Development Training Centre a tlawh

Parliamentary secretary Hmingdailova Khiangte chuan, Thawhlehni khan Bualpuia Mission Development Training Centre a tlawh a, an kal-phung a enfiah.

Hmingdailova Khiang-te chuan, Centre-a thawktute chu an hnathawh dan leh training an kalpui dante a zawtfiah a, "In hnathawh hi thil ṭangkai tak, rawngbawltu chher chhuahna pawimawh tak a ni a, zau zawka mipui hnenah pawh puanzar theih ni se a duh-awm," a ti.

Zirna sikul ṭha tak Bualpuia a awm chu Mizoram Synod rawngbawlna mai ni loin, Bualpui khua leh a chhehvel khuate tan pawh a ṭangkai tih sawiin Hmingdailova Khiangte chuan, Centre enkawltute chu khaw-tlang tana an thiamna hmang zel turin a ngen.

Mission Development Training Centre hi Synod Mission Board hnuaia din a ni a, ram páwn lama missionary-te leh ring tharte'n an rawngbawlna kawnga hmasawnna leh an dinhmun a ngêlngheh zel theihna atana thiam zirna hmun a ni. Centre-ah hian Synod hnuaia thawktu chhungkua 12 awmin, horticulture, agriculture, carpentary leh veterinary lam zir theih a ni.