YMA Day hlim taka lawm a ni

YMA Day vawi 82-na chu nimin khan Mizoram chhung leh páwn hmun hrang hrangah hlim taka lawm a ni.

YMA Day-ah hian branch tam tak chuan zing karah hnatlang koin, khawlai leh thlanmual tihfai hna an thawk a, chhun lama hnatlang pawh an awm.

Branch ṭhenkhat chuan chhun lamah khelmual leh hall-ahte intihhlimna leh inelna an buatsaih a; branch ṭhenkhat chuan zaipawl leh hnam lam hmanga intihsiakna an buatsaih a ni. Zan lama khawtlang huap punkhawmna hun siam pawh branch
ṭhahnem tak an awm.

Central YMA hruaitute chuan YMA Day hi hmun hrang hrangah an hmanpui. CYMA president Lalbiakzuala'n Champhai sub-headquarters leh Biate branch-ah; vice president Vanlalruata'n Durtlang North, Aibawk, Kanan Veng leh Tuikual South branch-ah; general secretary Lalhmachhuana'n Durtlang, Salem Veng leh Chaltlang North branch-ah; assistant secretary R Lalngheta'n Sihphir, Bawngkawn South, N. Lungleng leh Hlimen branch-ah; treasurer J Lalsailova'n Serchhip Hmarveng branch-ah; finance secretary Lalrochuanga Pachuau-in Zarkawt leh Muallungthu branch-ah an hmanpui a ni.

YMA Day puala thuchah a tihchhuahah Central YMA president Lalbiakzuala chuan, khawvel inher danglam leh hmasawn zelah YMA kalphung pawh a thil tum leh thuvawnte hre reng chunga her danglam ve hret hret a ṭul thei tih a sawi a, "YMA leh zu hi sawi rem chi a ni lo," a ti.

Lalbiakzuala chuan, "YMA zahawmna kengtu ber - ṭanpui ngaite ṭanpuitu pawl a nihna hi thlauhthla loa kan vawn nun reng a ngai," a ti a; YMA member pungin, bungrua leh hmunhmate nei belh zel mah ila, YMA thuvawn chu innghahna bera hman zel a ṭul thu a sawi.

Lalbiakzuala chuan, YMA chu mi lian leh tê, hausa leh rethei ang khata entu, kohhran pawl leh political party hrang hrangte inlungrual taka telna pawl awmchhun a nih vangin a chhiat a ṭhatah member zawng zawngin mawh an phur tih a sawi a, "He pawl thianghlim leh zahawm tak hi politics boruak bawlhhlawhin tichhe lo se la, kohhran innghirnghona ṭha loin luhchilh lo se," tiin, YMA zahawmna humhalh zel turin member-te a sáwm.

Mite'n YMA-ah rinna an nghah avangin YMA thil tih chu tlo se, belhchian dâwl se a duh thu sawiin, Lalbiakzuala chuan, "Zo nun ze mawi - tlawmngaihna, aia upa zah, rinawmna, thawhrimna leh diknaah innghat se la, YMA hi a ṭhang zel ang," a ti a; YMA chu kawng engkimah a chhe lai siamṭhatu ni zel thei tura inbuatsaih a ṭul thu leh, thing leh mau, lui tui leh nungcha humhalh kawngah ṭan lak zel a ṭul thu a sawi.

CYMA President chuan, YMA branch-te chu an huam chhung ṭheuhah naupang sikul kái rual kái lote dap chhuak a, sikul an luh theih nana hma la turin a chah a; mahni khua/veng chhunga sikul thawm ṭhat, Zo nun ze mawi leh hnam lâm zirtir kawngah leh faina zirtir kawnga hma la zel turin a fuih a ni.

Lalbiakzuala chuan, Zo fate inpumkhat nan YMA-in hma a la zel dawn tih sawiin, inṭhendarh leh inla hrang zawngin khawsa lo turin Mizo zawng zawngte a chah a; YMA kumpuan ‘Ram leh hnam humhalh’ tihhlawhtling turin YMA member zawng zawngte'n ṭan an lak a ṭul thu sawiin, "Mizoram hian YMA bak hmangaihtu leh siamṭhatu tur a nei bik lo a, ram leh hnam tirálṭia tibuaitu laka humhalh hi YMA tih tur a ni," a ti.

Electric Veng branch chuan nimin khan an YMA Hall-ah YMA Day an lawm rualin an branch kum 50 tlin, golden jubilee lawmna an hawng nghal a, an branch secretary hmasa ber F Lallura'n a hawng.

Thla hnih chhunga ruihhlo an man - heroin, khuh damdawi, parvon spas leh ganja, Rs. 2,03,500 hû chu branch president K Lalthanmawia'n a hal ral.

Central YMA chuan YMA Day pual hian Endowment Fund aṭangin YMA Day pualin mi 321 hnenah Rs. 6,42,000 a sem. Pawisa hi mi pakhat hnenah Rs. 2,000 zel pek tur a ni.

Young Mizo Association hi kum 1935 June 15 khan Young Lushai Association tih hming pu-a din a ni a, kum 1947 khan YMA tia thlak a ni. Tun dinhmunah Central YMA hnuaiah sub-hrqs. YMA panga, group YMA 47 leh branch YMA 806 awmin, member 4,04,535 an awm mek.