Hauruang YMA Rûn hawng

Chalrosanga Ralte chuan, a MLA fund Rs. 1,50,000 leh HPC fund Rs. 3,50,000 senga a bial chhunga Hauruang YMA Rûn sak thar chu nimin khan a hawng a; Hauruang branch YMA-in YMA Day an hmanna a hmanpui nghal.

YMA chu missionary-te'n pawl thiang-hlim ni tura an din a nih thu sawiin, Chalrosanga chuan, "Tumah thlei bik nei lo, kohhran leh political party thliar bik loa thianghlim taka hma lam a pan zel a pawimawh. Dàn chunga lêng kan awm lo a, khaw-tlang tana hma kan lak kawngah dan palzûtna awm palh thei a ni a, kan inven a pawimawh hle. Dan chunga lêng pakhat chiah a awm a, chu chu khaw-ngaihna a ni. Mi harsa leh chhumchhia,
ṭanpui ngaite ṭanpui thei tura khaw-ngaihna kan neih a ngai," a ti.

Chalrosanga Ralte chuan, lui dung, ramngaw leh nungcha humhalh a ṭul thu sawiin, "YMA chu ṭanpui ngaite ṭanpuitu a nih angin, khaw-tlang tan mi ṭangkai leh mi harsa leh chhumchhia-te belh tlak leh tlân luhna tlak a nih a ngai," a ti a; YMA member-te chu sorkar hmalakna ṭawiawm ṭhin turin a chah.