Mizo Carbon Product chhui turin Anti Corrupion Bureau hriattir

June 13, 2016-a Council of Minister thutlukna angin, chief secretary Lalmalsawma chuan Anti Corruption Bureau (ACB) hnenah Industrial Growth Centre, Luangmuala M/s Mizo Carbon Product Ltd.-in Central Transport Subsidy leh Central Capital Investment Subsidy (CCIS) dik lo takin a dil nia sawi chhui chiang turin a hriattir.

Thu dawn danin, Chief Secretary hian ACB hnena Mizo Carbon Product-in subisdy a hmuh dan chhui chiang tura a hriattir rual hian, Industries Secretary chu M/s Mizo Carbon Product-in CTS leh CCIS a hmuh theihna tura dilpuina, sorkar laipuia a thawn bawhzui lo turin a hriattir nghal.

June 10, 2016-a YMA Central Executive Committee ṭhukhawm chuan, Mizo Carbon Product-in CTS leh CCIS an dil lehna, May 27, 2016-a State Level Committee ṭhukhawmin a pawmpui (recommend) chu an duh loh thu an sawi a; industry neitu Ravi Gulgulia chu Mizote zah loah puhin, June thla chhung ngeia Mizoram chhuahsan turin an hriattir a ni.

Central YMA chuan, subisdy dilna chu kaltlangpui a nih chuan sum petu, sorkar laipuia Department of Industry Promotion Policy hnenah Mizo Carbon Product dinhmun hrilhfiah bakah, an lehkha copy chu Prime Minister pek an tum.

RTI Act hmanga Vanglaini zawhna Industries department-in an chhan danin, January 1, 2013 aṭanga September 30, 2014 inkar khan Mizo Carbon Product Ltd. hian CCIS atan cheng nuai 93.90 leh CTS atan cheng vbc. 2.47 dilna, District Industries Centre, Aizawlah an thehlut a; dilna chu SLC-in a ngaihtuah hnuah, an dil zat ang sorkar laipuiah an dilpui a ni.

Mizo Carbon Product hian CTS atana cheng vbc. 10.34 dilna District Industries Centre, Aizawlah an thehlut leh tawh a, chu chu Directorate of Industries-ah enfel hnuah, State Level Committee chuan a recommend leh a ni.