Police officer thupek zâwm lote lakah Na zawka action lak a ni dawn: HM

17th June, 2016

Mizoram Police Service Association (MPSA) chuan, nimin khan Police Headquarters-a Arya Mess-ah inkhawmpui an hmang a; khuallian, Home minister R Lalzirliana chuan, thupek zâwm lo police officer-te lakah na zawka action lak a nih tur thu a sawi.

Home Minister chuan, police officer zingah tih loh tur ti lui tlat an awm ṭhin tih sawiin, "Thâ leh zung, sum leh pâi ît ngawih ngawih tel lo hian in khawsa thei tih ka chiang. Nangni aia rethei, thla tin hlawh lâk tur pawh nei ve lo hlim taka khawsa an tam lutuk. Tun hmaa in chìn ṭhin ṭha lote in paih vek a ngai a ni," a ti.

Ṭha takin thu sawi a ni ṭhin tih sawiin R Lalzirliana chuan, "Thupek zâwm lote pawh intimualpho loin, explanation call bakah thil ṭha kan inhrilh ṭhin. Tunah chuan kan sawi rei tawh a, thupek zâwm lote chungah action lâk a ṭul tawh," a ti a; thupek zâwm lo, mipui hriat tura hrem ngai an awm chuan anmahni mawhphurhna a nih tur thu a sawi.

HM Zira chuan, MLA inthlan a hnaih tawh avangin, 'A khawng vak tawh lo ang, politician-te chu vote zawng an ni,' tia ngaihtuahna sêng an awm theih thu sawiin, "Chutiang rilru pu an awm chuan keimahah chuan min zuam sualin ka ring. Thupek zâwm lote lakah chuan kan tih hreh em em tih a ngai dawn," a ti.

Home Minister chuan police officer-te chu an lakah minor penalty ngawt ni lo, hremna na zawk lek a nih pawhin anmahni inen lêt ve a, amah dem lo turin a chah.

Parliamentary secretary (Home) Lt.Col. ZS Zuala chuan, police-te chu hmun hlaa awm apiang duhsak ni se a duh thu sawiin, "Hmun hla hlaa awmte duhsak an nih chuan Aizawla awm dilna nasa lutuk pawh hi a ziaawm ang," a ti a; officer fel deuh si, naute enkawl thiam lo a awm theih thu a sawi.

MPSA inkhawmpui hi an president Lalbiakzama'n a kaihruai a; inkhawmpui hmasa leh kumin inkhawmpui chhunga an member pension-a chhuak thlahna hun leh member thar lawmpuina hun an hmang. Nikum leh kumin inkhawmpui chhung hian MPS direct-a tling thar panga leh promotion hmanga MPS-a kaisang mi 10 an awm.

MPSA hi July 28, 1995-ah din a ni a, May 24, 2002 khan Mizoram sorkar aṭangin pawmpuina an hmu a; member 136 an awm mek a ni.