Mizoram sorkar leh HPC(D) an inbe dawn

Mizoram sorkar leh Hmar People Convention (Democatic)-te chu inremna siam turin inbiak an tum a, an inbiak hun tur erawh hriat theih a la ni lo.

Mizoram Police Service (MPSA) inkhawmpui nimina a hmanpuinaah Home minister R Lalzirliana chuan, "YMA group pathumin Central YMA kaltlangin HPC(D) leh Mizoram sorkar inbia se an duh thu an rawn thlen a, rambuaia kum 26 chhung an awm tawh avangin hrehawm an ti a ni," a ti.

Home Minister chuan, inrem lo ṭhinte leh thisen inchhuah ṭhinte pawh dawhkan kîla sawi fel a ni ṭhin tih sawiin, "Inrem lohna hi silai hmanga chinfel theih a ni lo," a ti a; dawhkan kîla inrem turin Mizoram sorkar leh HPC(D) an inbiak dawn thu a sawi.

R Lalzirliana sawi danin, HPC(D) area-a V/C inthlan neih a nih dawn khan campaign-a an kal ṭumin Mizoram sorkar leh HPC(D) inbe tura an duh thu mipuite'n an tlangaupui a ni.

Mipuite chu sorkarin a tih theih loh tur, autonomous district council (ADC) an phût (demand) tlat chuan inbiaknain awmzia a neih dawn loh thu HPC(D)-te hrilh tura tih an nih bakah, Congress party thlan tlin an nih chuan inbiakna neih tum a nih tur thu hrilh an ni.

V/C inthlanah Congress party-in hnehna an chan thu sawiin Lalzirliana chuan, "Tunah chuan láwm thâ sût ve a ngai dawn. HPC(D) leh sorkar rei lo têah an inbia ang, file a kal mek. Kan inbiakna hian a rahchhuah tur erawh kan hre lo," a ti.