Mizorama Covid-19 inkái chhawng Ni 3 chhungin mi 11 hmu chhuak
Mizorama Covid-19 hripui vei hmuh chhuah thar zingah Mizoram chhunga mi dang aṭanga kái chhâwng (positive contact) an pung zel a, an zingah hian Villaga Council inthlana official tur pakhat a tel.
August 21, Zirtawpnia hripui vei hmuh chhuah mi pariat zinga pahnih; August 22, Inrinnia hmuh chhuah zinga pariat leh nimina hmuh chhuah pakhat chu Mizoram chhunga kái chhâwng an ni.
Nimina Covid-19 vei hmuh chhuah thar pakhat, Sakawrdai lama mi chu Mizorama positive contact a ni a, Zangena Filling Station-a thawkin Covid-19 a vei vanga a kài chhàwn theihte chhuina kal zela swab sample lak a ni. Thu dawn danin, August 21-a ZMC laboratory-a Covid-19 vei hmuh chhuah zinga pakhat, Tuikual North-a mipa kum 57 mi chu Mizorama positive contact a ni a, Rangvamuala hripui vei hmuh chhuahin a kài chhàwn theih chhuina kal zela endik, khung hran lai a ni. Hei vang hian, Tuikual North LTF leh sorkar official-te'n an kài chhàwn theih awmte an chhui zui zel. Ani bakah hian, August 21-a hmuh chhuah Vairengte checkgate-a medical duty zinga health worker pakhat chu Mizoram chhunga kái a ni a, a swab sample endik a nih lai hian Covid-19 symptom a lang ṭan a ni.
August 22-a hripui vei hmuh chhuah mi 14 zinga pariatte pawh Mizorama kái chhâwng an nia hriat a ni a; ZMC laboratory-a hmuh thar mi pasarihte chu Mizorama positive contact vek an nih bakah, Lunglei Civil Hospital laboratory-a hmuh chhuah hnam dang pakhat pawh positive contact a ni bawk.
ZMC-a hmuh chhuah zinga mi - Lunglei Electric Veng mi (Kolasib-a awm mek), Bûkpui khaw mi leh Khanpui mi pakhat ṭheuhte chu Zangena Filling Station-a thawkin Covid-19 a vei vanga a kài chhàwn theihte chhuina kal zela swab sample endik aṭanga hmuh chhuah an ni a; Seṭhawn hmeichhia pahnih leh Melriat khaw mipa pahnihte pawh positive contact an ni. Thu dawn danin, Lunglei Electric Veng mi hi Meidum khuaa Pathian rawngbawlna thila awm mek a ni.
Bûkpui mi hripui vei hmuh thar chu Bukpui Middle School-a zirtirtu, VC inthlan lo awm tura election official zinga mi a ni a, August 15 khan Zangena pump-ah petrol a la a ni. Ani hi August 19 pawh khan VC inthlan atana inbuatsaihna, Kolasib-a neihah a la tel niin an sawi. Melriat khaw mi pahnih, Covid-19 vei tih August 22-a hmuh chhuah tharte pawh positive contact an ni a, anni hi state pawn aṭanga sipai rawn haw buaipuitute zinga mi an nih thu dawn a ni. Pakhat zawk chu August 21, Zirtawpni khan Trinity Hospital-ah a inentir avangin damdawi-ina thawk mi eng emaw zat chu khung hran mek an ni.
Hetih lai hian, Durtlang North-a Covid-19 vei nu pakhatin a kài chhàwn theih àwma ngaihte chhui zuinaa swab sample endik mi 25-te'n hripui an kai lo tih hmuh a ni thung.