Mt. Everest láwn chhuak Rintluangi a lo haw

  (20) d/o Lalbiak­nipuia, Dawrpui Vengthar, May 21, 2016-a Mt.Everest chhipa láwn chhuak chuan nimin khan Aizawlah a thleng a; Lengpui Airport-ah mi
ṭhahnem takin an lo hmuah bakah, tlaiah Vanapa Hall-ah amah lawmna inkhawm neih a ni.

Lalrintluangi hi Lengpui Airport-ah khuallàm nen lo hmuah a ni a, mi
ṭha­hnem tak an tel. A pualin inkhawm tâwi buatsaih a ni a, pawl hrang hrangin chawimawina thilpek an hlân.

Vanapa Hall-a Lalrintluangi lawmna inkhawma khuallian, Sports & Youth Services minister Zodin­tluanga chuan, Lalrintluangi chu Mizo hnam tan chhuanawm a tih thu leh a hlawhtlinnaah a lawmpui thu a sawi a; sorkar aṭanga lawmpuina Rs. 5,00,000 a hlân nghal.

Zodintluanga chuan, Mt. Eve­rest-a lâwn chhuah tumte chu nunna thâpa kal an nihna lai a awm tih sawiin, "Chetsuala nunna chân mai theihna karah a tum a hlen chhuak thei leh tluang taka a rawn haw thleng thei hi an tumruhna vang leh Pathian hruaina vang a ni," a ti.

Mizo hmeichhiain khawvela tlang sang ber a lâwn chhuak chu ropui a tih thu sawiin, Zodintluanga chuan, "Mi tam tak tih theih loh a ni a. Tlang sang ber láwn chhuak turin nasa taka inbuatsaih a ngai a, mi taima leh tumruh tan lo chuan lâwn chhuah theih a ni lo," a ti. Mizo ṭhalaite chu kawng hrang hrang - lehkha zirna, infiamna, zai lamah te, an kalnaah hlawhtling ngei turin Lalrintluangi tumruhna entawn turin a chah.

Vanapa Hall-a inkhawm zawhah hian Dawrpui Vengthar khawtlangin Vanapa Hall aṭanga an veng hall thleng an zâwn a; YMA Hall-ah amah lawmna inkhawm neih leh a ni.

Kum 1995-a piang Lalrintluangi hi KM Higher Secondary School-a pawl 12 zirlai a ni a, Mt. Everest láwn tura a inbuatsaih avangin HSSLC Examination 2016 kha a hmachhawn thei lo. Mt. Everest láwn thei tur hian Mt. Deo-Tibba, Himachal Pradesh (metre 6,001), Mt. Trishul, Uttarakhand (metre 7,120) leh Siachen Glacier-ahte a láwn chhuak tawh.

Lalrintluangi hi India rama NCC hmeichhe dang pakuate nen Col. Gaurav Karki leh Lt.Col. Vishal Alhawat te kaihhruaiin Mt.Everest-ah hian an láwn a; India President-in New Delhi aṭanga a vailiam hnuah April 2, 2016 khan Basecamp (ft. 17,590) an thleng. Basecamp aṭangin May 18-ah an chhuak a, May 21 zing dar 10:45-ah Mt.Everest chhip chu a láwn chhuak a ni.

Rintluangi buaipuitu Zotrek Youth Adventure Club tarlan danin Mt.Everest chhîpah hian August 2015 thleng khan mi 4,093 an láwn chhuak tawh a, lâwn tumte zinga mi 283 chu an thi niin an tarlang.