Sihhmui Tlawng lei dawh zo

Sihhmui leh Lengpui inkar, Tlawng luia thir lei (bailey bridge) chim tawh dawh ṭhat hna chu nimin khan PWD (Mechanical Circle)-in an thawk zo.

PWD Mechanical Circle engineer-te sawi danin, Tlawng lei dawh ṭhata hna hnuhnung ber, lei chhuata thîr phek phah hna chu nimin tlai khan an thawk zo. Hna thawktute chuan lei dawh laia an hmuna an riahna hmun chu an chhuahsan nghal mai dawn lo a, vawiin chawhma lamah lei chung lama tihchakna atana thîr kilh khawm leh a kilhnate enfiah a ni ang.

Lei hi dawh zo tawh mah se, lirthei tan zawh nghal mai theih a ni lo a, lei sir tawn tawna lirthei tlan luhna tur chhùn sàn te, kawng chhuat chhùn pàwn leh siam rem te, chîl muk leh chumi hnua emulsion tui hmanga cold mix siama kawng chhuat zût mamte a la ngai a ni.

PWD chief engineer (Building) Lalmuankima Henry chuan, hna thawh la ngaite chu ngawrh takin an thawk zui dawn tih a sawi a; khaw awm danin a zir chuan June 25, 2016-ah lei chu lirtheiin an zawh ṭan theih beisei a nih thu a sawi bawk.