KHAWTHLIR

ATM hawng

Mizoram Cooperative Apex Bank Ltd.-in Champhai DC pisaa Extension Counter cum ATM booth an siam thar chu nimin khan Champhai DC Vanlalngaihsaka'n a hawng. ATM booth-ah hian information zawng zawng Mizo ṭawnga tarlan a ni.

Thing phun

Mizoram Rifle Association (MRA) bultumin nimin khan MRA leh Aizawl District Rifle Association-te chu R Dengṭhuama Auditorium, Mualpui kawt leh chhehvelah thing phunin an hnatlang a; mi eng emaw zat thawk chhuak-in, thing ṭiak ṭhahnem tak an phun a ni.

Zu rui 51 man

Excise & Narcotics department chuan May 2016 chhung khan zu zuar 51, zu rûi 29, rakzu litre 949 leh sap zu (ûm puitling) ûm 402 an man a; zu kaihhnawihah lirthei panga an man bawk.

Din cham lawm

Mizo Upa Pawl (MUP), Lunglei Venghlun Unit chuan nimin khan Lunglei Venghlun Primary School-I ah an din champha vawi 58-na an lawm a, bialtu MLA Chalrosanga'n a hmanpui. Chalrosanga chuan, upate chu hnam rohlu an nih thu a sawi a; Venghlun MUP hnenah hian lawmpuina Rs. 5,000 a pek bakah, MUP member kum 80 chung lam mi 24 hnenah Rs. 500 ṭheuh a hlan a ni.

Lalsangzuala ui

MNF party chuan thuchhuah siamin, Lalsangzuala (65), Churachandpur, Mizo comic ‘Sudden Muanga’ ziaktu June 15, 2016-a a thi chu thinlung taka an sûn thu an tarlang. MNF chuan, Lalsangzuala chu Mizote hnam anga phuar khâwmtu pawimawh tak a nih thu sawiin, "Mizo nationalism chhém alhtu, lemziak hmanga Mizote kan nihna anga pho chhuaktu leh thu awmze ril tak min fah ṭhintu kan chán hi, kan ui tak zet a ni," an ti.