NLUP bawng dinhmun sawifiah

AH&Vety department chuan thuchhuah siamin, NLUP hnuaia bawng lei dan dik lo leh bawngte chu hrisel loh vangin an thi nia sawi awm chu an sawifiah a; bawngte chu an zir chian thu leh thu dik tâwk lo a awm thu an tarlang.

AH&Vety department tarlan danin, Shillong aṭanga NLUP bawng sem tur leipui a, a dawngtu turte hruai tur officer ruat chungchangah AH&Vety Minister râwn a ni lo. Bawng tam tham lei turin fimkhur a ngaih vangin senior officer pakhat bawng lei tur endik hmasa tura ruat a ni a, chu chuan khawtual mi leh bawng chungchang hriate puihnain an lo khalh khawm ṭhin.

Bawng phurh theih a nih hnuah beneficiary-te hruaiin an duh an thlantir a, bawngte chu Meghalaya sorkara vety doctor-te'n an hriselna a ṭha tih an finfiah vek zel. Bawng ṭha tak tak, NLUP hnuaia lei phak loh, cheng nuai chuang mante a awm a, chungte chu a dawng turte'n pawisa thawh belh an huam chuan leitir phal a ni.

MPC ṭhalai leh Durtlang North Multi Commodities Societies hruaitute chuan June 8 khan Aizawl Press Club-ah thuthar thehdarhtute an kâwm a; kumin April thlaa NLUP hnuaia bawng lei danah thil dik lo a awm ngeia an hriat thu leh, thla hnih chhung-in bawng 16 an thih tawh thu an lo sawi tawh a ni.

AH&Vety department insawifiahna

λ Ringliana, Durtlang N-in bawng thi a tih chu thu dik lo a ni a, Berema leh Sapthlenga ten an bawng dawn an hralh tih an hmuchhuak.

λ C Lalnunmawia, Durtlang N-in a bawng a thi ve ve nia a sawi chu, pakhat a hralh a, pakhat a la kawl a, a dam ṭha.

λ Vanlalruata'n Shillong-ah doctor-in bawng lak tlak loh an tih a la lui a, an ṭhenawmte'n an bâwng tan ṭha dawn loa an hriat avangin a tiral.

λ Vanlalvuana'n a bawng pahnih thi a tih chu an chhui chian hnuah, bawng pakhat a hralh a, pakhat a la dam ṭha.

λ Arjun Thapa-in bawng pakhat a thi, pakhat damlo a tih chu a pahnihin an la dam ṭha.

λ Maya Gharti bawng thi ve vea report chu a pahnihin an la dam ṭha.

λ Lalruatkima, Selesih bawng pahnihte pawh an dam ṭha.

λ Thangzuala, Dawrkawn-in a bawng a thi nia sawi chu, a enkawl theih loh avangin a hralh ve ve tih a sawi.

λ Duhsangi, Durtlang Mel-5 chuan a bawng pakhat a thi a, pakhat a damlo tih an sawi chu thu dik lo niin an sawi. Bawng pahnihte an dam ṭha.

λ Lalthanzama, Durtlang Ramthar-in Shillong aṭanga an haw kawngah bawng pakhat chu chesualin a nâk ruh leh ke ruh a tliah vangin a tiral a, pakhat chu a dam ṭhat thu a sawi. Chhuanliana leh Lalrohluite pawhin chetsual vangin pakhat ve ve an tiral.