Lifetime tax lak titawp vek turin sorkar phût

MNF party chuan thuchhuah siamin, hun bithliah neia vehicle lifetime tax lak hrim hrim titawp turin Mizoram sorkar an phût tih an tarlang.

MNF chuan, June 13, 2016-a Congress sorkara Council of Minister ṭhukhawmin kum li chhung lirthei lifetime tax kum 15 atana an lak tawh, The Mizoram Motor Vehicles (Taxation) Act, 1996 tihdanglamna tur pawm a, kum nga atana pawh tawi an remti chu ‘Se bo hnua se kawng khâr’ anga an ngaih thu an sawi a ni.

Kum 15 atana lirthei neitute aṭanga chhiah lak chu an duh lohzia vawi tam tak an sawi tawh tih sawiin, MNF chuan, "Aizawl leh Lungleiah 'Chhanchhuahna kawngzawh' leh total bandh huaihawt hial a lo ni tawh," an ti. Sorkar thil tih dodal tum hrim hrim an ni lo a, Mizoram kawng chhe lutukah lirthei kum 15 chhung ṭha taka enkawl a harsat vang te, mipui phurrit siamna a nih vangtein kum 15 atana ṭum khata lifetime tax lak chu an dodal tih an sawi.

Lifetime tax kum 15 atana lak chungchangah Congress sorkarin chhuanlam chi hrang hrang a siam tih sawiin, MNF chuan, "State thuneihna piah lam a nih thu te, India ram puma intluk tlanga hman vek tur a nih thu an sawi tlat a... State tinin mahni state-ah Motor Vehicles Taxation Act leh Rules siamṭhat a ngaih thute sawiin, ṭan an khawh sauh sauh a ni," an ti.

Febuary 19, 2016-a Congress Bhavan-a Transport minister John Ro-tluang-liana'n vehicle lifetime tax chu an duh duhin an danglam thei lo tih a sawi tih sawiin, MNF chuan, "Kumin June 13-a Council of Minister-in an tidanglam leh si hi sorkar mumal lo, mahni thil tih leh hmalaknaa chiang lo, mipui bum chîng sorkar an nihna a lang," an ti a; kum nga atana lifetime tax lak an tum pawh ṭhiat a, chhiah petu mipui duh dan tilal zawk turin sorkar an phût a ni.