Finishing School aṭanga chhuakte lawmpui

Pachhunga University College (PUC) chuan an zirlaite puala an buatsaih 'Finishing School' an buatsaiha zir chhuak zirlai 20 lawmpuina hun nimin khan an college-ah an buatsaih a, Mizoram Youth Commission (MYC) chairman T Sang-kunga'n a hmanpui.

T Sangkunga chuan, ṭhangtharte'n mahni inrintâwkna dik nen huaisen taka khawvel an hmachhawn theihna turin nasa takin sorkarin hma a la tih a sawi a, "Chief Minister pawhin ṭhahnem a ngai em em a, ṭhalaite hmasawnna turin sum sên a hreh lo. Kum hnih chhung lekin Mizo ṭhalai 5,428-te skill training pein a chherchhuak tawh a, chu'ng zinga 3,640 chu Mizoram páwnah training tir an ni," a ti.

MYC Chairman chuan graduate ih chiah hian kal dan tur thlan thiam a pawimawh tih sawiin, "Ngaihtuahna fim an hman thiam a ṭul hle a, kawng engkimah chu chu an hlawhtlinna tehfung pakhat a ni reng dawn a ni," a ti a, hlawhtling tur chuan a man pek ngai a awm ve a ni tih hria a, tumruhna nen hlawhchham tum lohna rilru pu chunga ke pen turin zirlaite a fuih.

Finishing School duang chhuaktu, PUC principal Dr Tawnenga chuan, zirlaite'n college an chhuahsan hnuah mahni inrintâwkna nei chunga khawvel an hmachhawn a, khua leh tui ṭangkai, nunphung zahawm leh belhchian tlak an neih theih nan kawng kawhhmuh a ṭul tih hriain, Finishing School an din tih a sawi.

Finishing School hi degree course-a 6th. semes-ter exam zo tawhte tana buatsaih a ni a; mihring khawsakna leh nun-phung kawng hrang hranga mahni inrintawkna an neih theihna tura zirtirna ṭha pek chu a tum ber a ni.