Total lockdown a tâwp

Mizoram sorkarin Covid-19 darh zel tur venna atana Aizawl Municipal Corporation (AMC) huam chhunga August 16, 2020 zan aṭanga total lockdown a puan chu tukin zing dar 4:30 khan a tâwp a, pawhsei a ni dawn lo.

AMC huam chhungah hian August 16 zan khan total lockdown puan a ni a, August 21 zing dar 4:30-a tâwp tur a ni. Mahse, August 20 khan Zangena Filling Station-a thawk pakhatin hripui a vei tih hmuh chhuah a nih avangin contact tracing tih a awlsam zawk nan inkhàrkhip chu vawiin zing dar 4:30 thleng pawhsei a ni.

Total lockdown chungchang hi nimin khan Health minister Dr R Lalthangliana hoin Covid-19 Operational Team chairman, Dr ZR Thiamsanga, MLA; chief secretary Lalnunmawia Chuaungo leh official dangte'n an thlirlet a, lockdown hi kalpui chhunzawm  loh an rel.