MLPC Act hman hun tur Hriattirna chhuah a ni dawn

Excise & Narcotics minister R Lalzirliana chuan, January 2015 chhungin Mizoram Liquor Prohibhition & Control (MLPC) Act hman hun turah hriattirna gazetted-a chhuah a nih tur thu a sawi.
Excise & Narcotic commis­sionarate-a thawkte'n nimina an conference hall-a kum thar lawmna leh infuih tharna an neih a hmanpuinaah thu sawiin, Excise minister chuan, MLPC Act chu 2014-15 financial year chhung ngeia hman tum a nih thu a sawi nawn a, "Zu zawrh chhuah hmain a lei theihna permit pek chhuah hmasak phawt a ni ang," a ti.
R Lalzirliana chuan, MLPC Act hman a nih hnuah chuan Excise & Narcotics-a thawktute chu khauh zawka an kal a ngaih tur thu sawiin, "Thawktu chu thil dik lo leh tiṭha duh lo, department tihmingchhe zawnga awm chu dim an ni lo ang. An aiawhtu tur mi ṭha tam tak an awm a ni," a ti a; Excise department-a thawhte chu rinawm leh taima taka thawk turin a fuih.
Minister R Lalzirliana chuan, Excise & Narcotics department chu department lian lo tak ni mah se, Mizoram retheihna
aṭanga chhanchhuaktu tur zinga mi a nih avangin a nêp thei lo tih a sawi a "Thawktu tlem hle mah se, lungrual taka a dik lo leh ṭha lo laite sawi chhuak mai lo a, thawm ṭhat zawk a nih chuan department zahawm leh thil ti thei tak a la ni thei a ni," a ti.
R Lalzirliana chuan, Mizo­ram chu state dang hnunga tlân reng tur leh sorkar laipuia kut dawh reng turin Pathianin a dah a rinawm loh tih sawiin, "Kan ram leilung hausakna hmangin nasa takin sum kan la hâi lut dawn a ni," a ti.
Thu sawitu dang, Excise commissioner Lalhmunsanga chuan, MLPC Act chu tlanchhe chunga ruahman a nih loh thu sawiin, "MLPC hi Mizoram society mil tur bera a duan a ni," a ti a; MLPC Act chu zu phalraina tur ni loin, na zawka thununna tur a nih thu a sawi.