Tun thlaah buhfai man a to dawn

Food, Civil Supply & Consumers Affairs secretary R Lalvena chuan, December, 2014 khan buhfai man, January 1, 2015 aṭanga tihpunna tur hriattirna (notification) a tichhuak a; mi pawimawh bik, VIP-te'n quota an neih ṭhin tihtawpna no­tification pawh a chhuah tawh bawk.

Supply secretary-in notification tihchhuah dan chuan, retailer-in kudam aṭanga buhfai quintal khat an lakna man, Rs. 930 ni ṭhin chu Rs. 1,450-ah tihsan a ni. Retailer-te chuan buhfai kg. khat Rs. 9.30-a an hralh ṭhin chu Rs. 15-in an hralh tawh dawn a ni.

FCSCA notification thar ang chuan, retailer-te'n buhfai kg. khat zela an hlawh a pung dawn a, kg. khata pawisa 20 an hlawh ṭhin chu January 2015 aṭang chuan duli (pawisa 50) an hlawh tawh ang.

Hetih lai hian, FCSCA depatrment chuan sorkar hnathawk lian leh sum­dawng hausate chu an ration card sorkara thehlut turin a ngen a; ration card thehluttute chu ration card dang, ration lakna atan ni lo, document atan bika hman tur siamsak an tum a ni.