Mipuiin hunpuia veng chei an hlut

Kum 2014 Krismas puala Aizawl khawpuia khawlai chei chu mipuiin an hlutin tlawhtu an ṭhahnem hle a; veng chei nasa zual 14-te'n an veng chhung an cheina atana sum an hman belhkhawm chu Rs. 34,68,000 vel a ni.

Vanglaini-in khawlai cheitute a biak kualna aṭanga a lan danin, Aizawl veng hrang hranga khawlai cheinaah YMA chu a bul tumtu ber an ni deuh zel a, local council leh NGO dangte nen an thawkho a, kohhran ṭhalaite pawh an tel.

Veng hrang hrangte hian an veng chhung ṭheuhah thawhlawm an khawn a, a hausa deuha ngaihte chu thawh tam deuh turin an ngen. YMA branch ṭhenkhat chuan kum tìr aṭangin an ruahman lawk a; veng ṭhenkhat chuan YMA Decoration Sub-Committee hmalaknain an kalpui a, ṭhenkhat chuan a cheitu tur bik Sub-Committee an din.

Chanmari kâwn cheitute erawh chu kohhran ṭhalai, KṬP leh ṬKP an ni a, Khatla kâwn chu local council bul tuma chei a ni.

YMA branch hrang hrangte zinga a tam berin an veng cheina hmanrua chu Guwahati aṭangin an lei a, Silchar, Delhi leh Aizawl-ahte an lei nual bawk.

Veng chei nan hian Armed Veng-in sum an seng tam bera hriat a ni a, Rs. 5,00,000 a seng; anni hi Aizawl Municipal Council-in veng chei mawi lawmman a siama pakhatna dawngtu an ni.

Rs. 4,50,000 sengtu Ramhlun North chu sum seng tam ber dawttu niin AMC tehnaah pahnihna an ni a, Chanmari chuan Rs. 3,70,000 sengin AMC aṭangin lawmman pathumna dawngtu an ni.

Hetih lai hian, veng cheina sum hmang tarlan bik veng 14-te chuan Krismas puala mi harsate ṭanpuina lam an ngaihthah chuang lo a, ṭanpuina sum an hman zat belhkhawm chu Rs. 4,96,350 a ni.

Mipuiin an hlut

Krismas vuatveta veng chei hi mipuiin an hlut hle a, a cheitu khawtlang hruaitute chuan veng inlungrualna thlentu a nih thu an sawi hlawm a, veng pawn aṭanga tlawhtu an neih avangin an lawm hle.

AMC hnuaia lawmman pakhat­na dawngtu Armed Veng chuan chawhrualin zan tin mi 3,000 vel tlawhtu an nei a; anni hian Chhinga Veng nen inzawmin Dawrpui thlanmual an chei a ni.

Hunpui laiin Aizawl khawpuiah chhun lam aiin zan lamah traffic jam a nasa zawk hiala ngaih a ni a, veng chei en tumin zan lamah mipui nawlpui an leng chhuak a, chhungkuain hun hlimawm tak an hmang.

Veng ṭhenkhat chuan an kawn chei pualin zan lamah intihhlimna hunte an hmang bawk a, veng pum­in hun hlimawm tak an hmang.