Bangladesh-a tawlh luh tur mau 19,880 man

April-December 2014 chhung khan Tlabung bula Khawthlangtuipui kal tlanga Bangladesh-a tawlh luh tur mau 19,880 man a ni.

Environment & Forest department-in dân kalha Mizoram maute Bangladesh-a tawlh luh tur an man neitute chu hnam dang an ni tlangpui a, maute hi Khawthlangtuipui hnár lam aṭangin tuipui hmanga Bangladesh-a tawlh luh tura lâk an ni deuh ber.

Sumdâwnna atana hman tura Mizoram chhunga maute ram páwnah tawlh phal a nih loh avangin, tu hnenah mah mau tawlh phalna (permit) pêk a ni lo tih, Tlabunga Environment & Forest department hotute chuan an sawi.

Tlabunga E&F hotute sawi dan­in, April-December 2014 chhunga mau an mante chu Mizoramah an lilám leh a, chuta ṭanga an sum hmuh, Rs. 1,98,820 chu sorkar sum báwm­ah an chhûng lut a ni.

Hetih lai hian, a khát tawkin Mizora mau eng emaw zât chu ramri kaltlangin Bangladesh-ah tawlh luh a la ni ṭhina thu dawn a ni a; Bangladesh lamah man to zawka mau hralh a nih ṭhin avangin mi ṭhenkhat chuan sumdawn nan an hmang ṭhin niin thu dawnna chuan a sawi.