January 19-24 ah Fire Prevention Week

State Level Fire Prevention Committee chu nimin khan Environment & Forest minister Lalrinmawia Ralte hoin a pisaah an ṭhukhawm a; ram tikângtute hrem an nih theihna atan ruahmanna an siam a, January 19-24, 2015 chhungin Fire Prevention Week hman an rel.

Meeting chuan, dan pawisaloa ram tikângtute hriat an nih theih nan leh a ṭul anga an chungah hremna lek a nih theih nan village council leh local council-te chu lo hâl tur nei chhungkaw hming PCCF-a thehlut tura hriattir ni se, an ti a; hei hi a ṭul angin LAD-in an bawhzui ang.

February 8, 2014-a Sub-Committee-in ruahmanna a siam tawhte an thlirho a, Sub-Committee-in ruahmanna a siam, Fire Prevention Week, January 19-24, 2015 chhunga hman tura tih chu pawm a ni.

Lo hâl hun chungchangah, March 15, 2015 hmaa hâl vek tura hriattirna chhuah an rel a; Lengpui Airport leh a chhehvel khua - Lengpui, Lengte, Nghalchawm, Sairang, Khamrang, Kawnpui, Serzawl leh Hortoki-te chu tlai dar 3 hmaa lo hâl lo tura hriattir tum an ni.

Kumin hian kum dang angin kângmei tichhuak lo leh kângmei ven kawnga hna thawk ṭha district leh khua thlan an ni leh ang.

Meeting-ah hian State Level Fire Prevention Committee member atan General Administrative Department (GAD), Disaster Management & Rehabilitation (DM&R) department leh State Pollution Control Board-te ruat belh an ni.