KHAWTHLIR

August 22, Inrinni khan Rapid Antigen Test (RAT) hmanrua (kit) 10,000 Mizoramah a rawn thlen belh. RAT kit hi thlawhtheihna hmang­in Lengpui Airport-ah a thleng a, a ṭul anga hman turin pek chhuah a ni ang. Sorkar thu­chhuah tarlan danin, RAT kit 20,000 chah leh mek a ni a, Delhi Mizoram House-ah a awm tawh a, tun kar chhungin Mizoram a rawn then beisei a ni.

Aizawl DC chuan thupek chhuahin, Darlawn leh Sawleng khuaah Covid-19 vei hmuh chhuah a nih avangin, Darlawn Village Council area leh Sawleng VC area chu tlawh pawh phal loh, containment zone-ah a puang. Containment Management & Active Surveillance team-te'n a ṭul angin chhui zui ngai­te an buaipui mek a ni.

August 22, Inrinni khan Bawngkawn Bial ṬKP-te'n Aizawl Civil Hospital-ah thisen unit 42 an pe a, petute mipa 39 leh hmeichhia pathum an ni. AYF, Champhai North leh South bialte'n District Hospital tan thisen unit 53 pein, petute mipa 39 leh hmeichhia 14 an ni a; ṬKP Bethany Unit Lawngtlai College Vengte'n District Hospital-ah unit 22 pe bawkin, petute mipa 18 leh hmeichhia pali an ni.

Kolasib SP Vanlalfaka chuan thupek chhuahin, National Highway 306 (via Sairang) kawngpui thawm ṭhat mek a nih avangin eirawngbawlna gas leh tuialhtheite district hrang hrangah hnianghnâr taka lak luh a nih theih nan gas leh tuialhthei phurte chu Kawnpui to Aizawl (via Sihphir) kawngah tlân phalsak a nih thu a puang. Gas leh tuialhthei an phurh loh lai chuan tlân phal a ni lo thung.

State Referral Hospital-ah Covid-19 vei mi 40 enkawl mek a ni a, ICU leh SICU-ah pahnih ve ve leh Isolation Ward-ah 36 an awm. SRH-ZMC Bulletin tarlan danin, ICU-a awmte'n hma an sawn a, ward-a awm zingah thawhah nasa vak lo nei pakhat a awm a, SICU-a awmten harsatna an nei lo