NLUP hi khawvel pum huap pawhin Programme zahpuiawm lo a ni: CM

18th June, 2016

Chief minister Lal Thanhawla chuan, nimin khan Mizo High School Field-ah NLUP hnuaia auto-rickshaw thlangtu mi 65 hnenah auto-rickshaw a hlan. NLUP sem zawhah Congress Bhavan-ah thu sawiin Chief Minister chuan, "Khawvel pum huap pawhin NLUP hi a zahpuiawm lo," a ti.

Lal Thanhawla chuan NLUP fakin, "Political party programme-ah chuan khawvel pum huapah pawh NLUP hi a zahpuiawm lo lawr lak. Khawvel sorkar changtlang leh chak zawkah pawh hetiang ang programme ṭha nei hi an awm lo," a ti a; NLUP chuan UNO thlenga ngaihven a hlawh thu a sawi.

Mizo High School Field-a auto-rickshaw semna inkhawmah thu sawiin Chief Minister chuan, "Ei leh bar, sum leh paia kan intodelh a, khawtlang nun kan siamṭhat a, kohhran nun kan tihngheh chhoh zel chuan Pathian kan chawimawi a ni. Pathianin min hûnna
ṭheuh hi a rawngbawl tur leh mite tana malsawmna ni tura min dahna a ni tih kan hriat thar a pawimawh," a ti.

Lal Thanhawla chuan, Industries department hnuaia auto-rickshaw trade, petty trade, puanṭhui leh trade dangte chu thlai leh trade dangte anga nghah ngai a ni lo tih sawiin, "Eizawnna tling nghal leh eizawn nana hman ṭheih nghal a ni," a ti a; a dawngtute'n rim taka an thawh chuan rei lo te chhunga a hlawhtlinna rah seng nghal theih a nih thu a sawi.

Chief Minister chuan, auto-rickshaw dawng tawhte chuan rinawmna, taimakna leh dikna nen hma an lak avangin hlawhtlinna an hmuh tih a sawi a; auto-rickshaw dawng thartute chu eizawnna ngêlnghet an hmuhna piah lamah, an khawtlang ṭheuha a mamawhtu leh khawtlang tan malsawmna ni turin a chah.

NLUP kaltlanga auto-rickshaw dawngtute hi Industries department-a NLUP third phase hnuaia mi a ni a; Aizawl South-III cluster-a mi pariat, Chalfilh biala mi pariat, Tuivawl biala mi 13, Ṭawi biala mi 10, Serchhip biala mi pasarih, Lunglei South biala mi paruk, Lunglei North biala mi panga, Lunglei East biala mi pali leh Lunglei West biala mi palite hnenah pek a ni.

First phase-ah mi 69 leh second phase-ah mi 196-in auto-rickshaw an dawng tawh.