Thing leh mau vangin Kawlphetha a thi ṭhin - P&E department
Power & Electricity department hotute chuan, thli tleh leh ruahsûr chánga power supply tàwp ṭhin zinga ṭhenkhat chu hnim (thing leh mau)-in electric hrui an tawh ṭhin vang a nih thu an sawi.
Zawhna chhangin P&E department hotute chuan, thli a tleh leh ruah a sûra kawlphetha thi ṭhin chu a thawktute'n an off vang a ni lo tih an sawi a, "Thing leh maute'n electric hrui an tawk a, chutianga hnim emaw, thing leh maute'n electric hrui an tawh chuan hmunpui lama khawlin a lo hre vat a, automatic-in a in off
ṭhin a ni," an ti.
P&E hotute chuan, hnim, thing leh maute'n electric hrui an tawh vanga automatic-a power in off chu an ngaihchân deuh hnuah an on leh
ṭhin tih an sawi a; chutih rualin, electric hrui chu tawktu a awm reng a nih chuan on mai theih loh chángte pawh a awm niin an sawi bawk.
Electric hruite chu thing leh maute'n an tawh loh nan theihtawp an chhuah thu sawiin, P&E hotute chuan, khaw hrang hranga P&E department-a thawktute'n an thlithlai reng a, tawk thei mai awma langte chu an sâmfai fo niin an sawi a ni.
Vanglaini palai zawhna chhangin P&E department hotute chuan, online hmanga electric bill pek theih dan tur ruahmanna a awm tih an sawi a; chutih rualin, a tak taka an buaipui theih hun tur hriat a ni lo a, tunah mai chuan hmalak tumna a la awm rih lo tih an sawi.
P&E hotute sawi danin, kum 2007 vel khan online-a electric bill pek theihna tur an siam a; mahse, online hmanga bill pe an awm mang lo a, a zûzî zui a ni. Online hmanga bill pek an tihtawp chhan chu, internet ṭhat tawk loh vang leh harsatna ṭhenkhat a awm vang niin an sawi.
Zawhna chhangin P&E hotute chuan, West Phaileng leh Mamit inkarah electric hruipui, 132 kV line thlun a la ni lo a, Dampui ngawah hrui kaltlangtir a nih vanga Mamit district-in harsatna an tawh ṭhin sutkianna tur an buaipui mek thu an sawi a, "Bairabi lam aṭangin 132 kV line siam hna thawh mek a ni a, zawh thuai beisei a ni," an ti.
Zuangtui-Serchhip-Bûkpui 132 kV line a chhiat fo vanga Mizoram chhim lam zawngin hun rei tak tak kawlphetha an hmuh loh ṭhin a awm tawh loh nan World Bank Road lamah 132 kV line hrui thlunna turin hna thawh mek a nih thu an sawi bawk.