KHAWTHLIR

Thisen pe

Sairang Bial KṬP-te chuan nimin khan Sairang Kohran hall-ah blood donation camp an huaihawt a, mipa 40-in Synod Hospital tan thisen unit 40 an pe. Republic Higher Secondary School pawhin nimin khan Aizawl Civil Hospital-ah thisen unit 35 an pe a, a petute mipa 35 leh hmeichhia panga an ni.

Hostel hawng

PC Girls School hostel building thar chu nimin khan Synod moderator Rev. H Lalrinmawia'n Pathian hnenah hlanin a hawng. Hostel hi May 2014-a sak ṭan niin, kum hnih chhunga sak zawh a ni a; a dung ft. 84 leh a vâng ft. 45, chhâwng thum a ni.

Zirlai lawmpui

Thenzawl West V/C-te chuan, nimin khan Vantawng Group YMA Rûnah an huam chhunga kumin HSLC leh HSSLC exam-a first division leh distinction-a pass mi 10-te lawmpuina hun an hmang a, MLA Lalruatkimna'n a hmanpui. An huam chhunga doctorate degree latu mi pahnihte leh CodNerc chairman B Lalchhanzova an chawimawi nghal.

Lalsangzuala sûn

ZNP president Lalduhoma chuan nimin khan an pisaa-ah thu sawiin, Sudden Muanga comics ziaktu Lalsangzuala (Laisaizawka) a thi chu Mizote tan chànna nasa tak a nih thu a sawi a; "Nationalist dik tak a ni a, State funeral a phû kan ti," a ti.

Kawng tlawh

Hachhek bialtu MLA Lalrinmawia Ralte chuan, Ningani leh nimin khan Medili, Assam
aṭanga Mizoram pawhtu kawng Khadachera-Damcherra-Zamuang-Kawrthar-Tuilut kawng siam mek a tlawh.

MPSA hruaitu

Mizoram Police Service Association (MPSA) chuan nimin khan hruaitu thar an thlang a; president-ah Lalbiakzama, general secretary-ah David H Lalthangliana leh hruaitu dangte an thlang.