BJP-in hmarchhak state lak an tum; Mizoram an la telh ngam lo: Hawla

MPCC president Lal Than-hawla chuan, BJP-in hmarchhak state-ah ram lâk an tum tih a sawi a, "An ram lâk tur zingah Mizoram an la telh ngam hrih lo," a ti.

Lal Thanhawla hian nimin khan Congress Bhavan-ah thu sawiin, "UPA sorkar laiin ringtute tihduhdahna a thleng lo ka ti lo a, lo firfiak deuhte chu an awm. NDA sorkar hnuah ringtute tihduhdahna a nasa hle a, UPA sokar laia thleng ngai lo a thleng nasa," a ti a; pastor tihduhdah leh biak-in suasam hriat tur a awm deuh reng niin a sawi.

Hmarchhak state la turin committee lian tak BJP-in an din tih sawiin MPCC President chuan, "Assam-ah sorkarna an chang tawh a, Manipur-ah pawh sorkar ngei an inring. Meghalaya an huphurh lo a, Nagaland chu a chîrî nuai tawh. Mizoram chu an beihpui thlakna turah an la ziak lang ngam hrih lo," a ti.

Lal Thanhawla chuan, BJP-te'n an ram lak turah Mizoram la telh lo mah se, an melh ṭan tih a sawi a; BJP-te chu Kristiante tiduhdahtute an nih avangin Mizoramah hmun an chan lohna atan theihtawp chhuah turin an party mite a fuih a ni.