South Sabualah Handloom Cluster hawng

Ningani khan South Sabual-ah Reiek Block Handloom Cluster hawn a ni a, parliamentary secretary (Industries) Joseph Lalhimpuia leh bialtu MLA Lalrobiaka ten an hmanpui.

Joseph Lalhimpuia chuan, handloom hmangin Zoram tan sum tam zawk lak luh sorkarin a tum tih sawiin, "Puantah hi Mizo nuna bet tlat, intodelhna tura kan theihna leh thiam-na pawhin a mil zawng tak a ni. Industry dangahte leh buh, thlai leh thei thar chhuah kawngah intodelhna tluantlinga chantir tham kan la nei thei tak tak lo a, handloom lamah erawh chuan khawvel thiamna el pha kan ni thei," a ti.

Lalrobiaka pawhin thu sawiin, "Handloom lam zirna hmun din a ni hi Reiek Block leh South Sabual khaw neitute tan a vanneihthlakin eizawnna kawnga malsawna tur a ni," a ti a; malsawmna chhawr tur chuan a dawngtu mipuite'n tih tur an nei ve tih an hriat a pawimawh thu a sawi.

Inkhawma tarlan danin, Mizoramah kum 2013-14 khan National Handloom Development Project (NHDP) kalpui ṭan a ni a, chumi hnuaia handloom tihhmasawnna kawng hrang hrang zingah Block Level Cluster Development a tel. Mizoramah pawh hmun pasarihah kalpui niin, sum first instalment hmuh tawh a ni a, South Sabual bik atana sum dah zat chu cheng nuai 231 a ni.