Phai aṭanga damlo rawn hawte SRH-ZMC-ah enkawl an ni dawn

Tun hnai khan Covid-19 Medical Operational Team chairman Dr ZR Thiamsanga, MLA hoin phai aṭanga Mizo damlo rawn hawte'n harsatna an tawh loh dan tur an sawiho a; damlo rawn hawte chu State Referral Hospital (ZMC)-ah enkawl zui tura tih a ni.

Dr ZR Thiamsanga chuan, Mizoram chhunga enkawl theih loh damlo, phai pan ngei ngei ngai an awm reng thu sawiin, "A ṭhente chu ICU-a awm nghal ngai te, dialysis leh chemo lâk zawm ngai leh damdawi-ina enkawl nghal ngei ngei ngaite an nih avangin, quarantine centre-a dah a rem chiah lo thei. Chu'ng damlote Mizorama an rawn haw huna an awm dan tur chu ṭha taka ngaihtuahsak an ṭul a ni," a ti.

Ṭhutkhawma an rêl dan chuan, phai aṭanga Mizo damlo rawn haw, quarantine centre-a dah rem lote chu SRH-ZMC-ah enkawl an ni ang a, ni 14 chhungin Covid-19 an vei leh vei loh endik a ni ang. Covid-19 vei lo tih finfiahte chu quarantine hun ni 14 a ral hnuah an duhna damdawi-inah sawn chhuah phal a ni ang. Meeting-ah hian Zoram Medical College, Aizawl Civil Hospital, Indian Medical Association, Mizoram Govt. Doctors Association leh Non-Government Hospital Association aiawhte an tel a ni.