BJP an zawmna titawp vat turin MPC party-in MNF party an phût

MPC party chuan nimin khan an pisaah Special OB Meeting an nei a; an president Lalhmangaiha Sailo-in kaihruaiin, kumina local council leh village council inthlan awm tur an thlirho. MPC chuan, MNF party chu BJP an zawmna leh CAA an thlàwpna a rang thei ang bera titàwp turin an phût.

Lalhmangaiha Sailo chuan, sorkar laipuia BJP sorkarin Citizenship Amendment Act a hlenchhuah theihna tura kawng hrang hranga an inhmakhua dan a sawi a, "Tun hnai lawka Army Chief pension chu post thar siamin, Chief of Defence Staff ni turin an ruat nghal. He General hian tun hmaa tuma la tih ngai reng reng loh leh Army rules pawhin a phal loh angin political statement a siam nghal a ni," a ti.

BJP-te'n Parliament-ah hmun thuma ṭhena hmun hnih (2/3) lamṭang an neih theih nan sum hmangin nasa takin hma an la tih sawiin Lalhmangaiha chuan, "Hei hi an duh duha Constitution an tihdanglam leh chinkual theih nan a ni," a ti a; Chief Election Commissioner atan RSS mi leh sa an ruat a, BJP duh dan angin India ram pum inthlan kalpui a nih thu leh, Supreme Court-a Chief Justice leh judge atan BJP lamṭang an dah zel thu a sawi.

Lalhmangaiha Sailo chuan, India President ni mek chu RSS ruhkawl a nih thu sawiin, "State Governor atan BJP/RSS mi leh sa an dah zel bawk. BJP hian India danpui khawih danglam vanga buaina chhuak thei aṭanga inven nan President emaw, sorkar hruaitu lawkte ṭawiawm turin army, air force leh navy-te unified command hnuaiah a dah thar a, chu'ngte chu Chief of Defense Staff-in a ho a ni," a ti.

MPC President chuan, BJP chu India ram tichingpentu leh himna tiderthawngtu, Kristiante tan phei chuan pawisak nei miah lo an nih thu sawiin, "Chutih laia Mizoram, Kristian state tih theih khawpa Kristian hlang awmnaa sorkarna chelhtu MNF-in BJP an la thurualpui tlat hi hnam ang pawhin a mualphothlak a ni," a ti a; MNF chu CAA an thlàwpna leh BJP an zawmna a rang thei ang bera hnûkdâwk turin an phût tih a sawi.