Kolasib district-a Covid-19 vei Hmuh tharte dinhmun sawifiah

Tun hnaia Zangena Filling Station, Aizawl tlawhtu zingah Kolasib district-a awm mek mipa pathumin Covid-19 an vei tih August 22, Inrinniah hmuh chhuah a nih avangin, nimin khan Kolasib DC Dr H Lalthangliana chuan Kolasib-ah thuthar thehdarhtute a kâwm.

Dr H Lalthlangliana chuan, Zangena Filling Station tlawhtu zingah Kolasib district mi pathum - Meidum, Saipum leh Bûkpui khuaa awm mekte'n hripui an vei tih finfiah a nih thu a sawi a, an dinhmun a sawi chiang a ni. Kolasib Bawrhsap sawi danin, Bukpui khuaa mi chu VC inthlan atana polling party zinga mi a ni a, August 19 khan Kolasib-a election training-ah a tel. Ama insawi dan erawh chuan, a fimkhur avangin mi dang tawh/khawih a nei lo. Chutih rualin, lirtheia a chuanpui chu a swab sample endik turin dah hrang nghal a ni.

Meiduma mi chu Lunglei Electric Veng mi, Meiduma kohhran rawngbawltu a ni a, Bairabi lamah bial fanga a kal kual avangin a kai chhàwn theih àwmte chhui zui mek niin, medical team-in nimin khan Bairabi an pan nghal. Bai­rabi khua pawh nimin aṭang khan thu leh awm hma chu an inkhàrkhip ngal bawk. Saipum khuaa mi chu IR police niin, a kài chhàwn theih âwmte chhui nghal a ni a, Saipum panna kawnga khaw pakhat, Lungdaiah chàwla thil a lei avangin Lungdaiah hian nimin khan inkhârkhip a ni.

Dr H Lalthlangliana chuan, Seṭhawn leh a chhehvela lirthei tangkhang vanga driver/handyman-te RAT hmanga endik ṭan ní-a Seṭhawn naupang kum 12 chhung­te chu endik hmasakah Covid-19 positive ni lo mah se, endik nawnna (August 22)-ah positive an ni tih hmuh chhuah a nih thu leh, an pahnihin quarantine centre-a awm mek an nih thu a sawi bawk.