MPYCC-in invenna hmanrua an pe

Congress ṭhalaite chuan, Covid-19 dona hmatáwnga thawkte harsatna zualpui phuhrûk nan leh Vairengte checkgate-a swab sample latu leh endiktute hman atan August 22, Inrinni khan Health department hnenah personal protective equipment (PPE) leh mit leh hmai vênna hmanrua eng emaw zat an pe.

MPYCC thilpekte hi PPE jump suit 40 leh protective goggles 10 a ni a, an president Dr Lalmalsawma Nghaka'n Health Services Director hnenah a hlàn a ni. Dr Lalmalsawma Nghaka chuan, PPE leh protective goggles an pek chhan sawiin, tun hnaiah Vairengtea swab sample laknaah PPE indaih lohna a nasa tih an hriat thu a sawi a, "PPE ren vangin darkar 12 chhungte a ngai hâk an ngai tih report kan dawng. Sorkar hian kan frontline worker-te an himna atan an mamawh bungrua hi khaihlak miah loa thuneitute'n an ngaihtuahsak kan phût a ni," a ti.

MPYCC President chuan, "Vairengte gate-a a hmatáwnga thawktute zing­ah medical lama thawk leh Excise lama thawk mi pakhat ve vein Covid-19 an kai tawh tih kan lo hria a, heng mite enkawlna hi sorkarin a tumsak ngei kan beisei," a ti a; a hmatáwnga thawkte himna tur nasa zawka ngaihtuah a, PPE tam zawk pe turin sorkar an phût tih a sawi.

Dr Lalmalsawma chuan, upa zawkte'n him taka vote an thlak theih ngei nan sorkar chu ruahmanna ṭha tak siam tura an phût thu sawiin, "Kan boruak tawn mek nen he inthlan hi Covid-19 inkai darhna remchang a ni ang tih kan hlau hle," a ti a; Congress party chuan inthlan chu hmachhawn an châk a, an phûr hle tih a sawi rualin, "Mipui himna leh hmakhua ngaitu tan chuan a huphurh­awmin, inthlan hun hi ngaihtuah nawn leh hial ni se a duhawm hle a ni," a ti.