Khawthlir

Brig. T Sailo Damdawi-inah

Chief minister hlui, Brig. T Sailo leh a nupui, Thansiami chu taksa chak lohna avangin New Life Hospital-ah enkawl mek an ni. Anmahni enkawltu, Dr Robert Lalmalsawma chuan, kum 93 mi Brig. T Sailo hi natna hrang hrang avang leh taksa chak lohna avangin December 27, 2014-ah damdawi-inah dah luh a ni tih a sawi a, ICU-ah enkawl a nih hnuah January 1, 2015 khan ward-ah sawn a ni.

Larsap lak luhdan tur sawiho
Nimin khan chief secretary Lalmalsawma hoin mi pawimawhte'n CS conference hall-ah January 9, 2015, tlai dar 6-a Raj Bhavan Durbar Hall-a Mizoram Governor atana ruat thar, Dr Aziz Qureshi lak luh dan tur an sawiho.

In saksak
December 26, 2014-a Kolasib Venglaia in pahnih kângte chu nimin khan Venglai YMA leh V/C hmalaknain sak
ṭhatsak an ni. In sakna atan hian Kolasib Venglai YMA chuan vengah vehbûr an khawn a, Rs. 1,18,000 hmuh a ni. YMA leh V/C-te chuan in sa turin an venga mistiri leh tlawmngaia thawk chhuak tur mi an thlang a, in hi Assam type-a sak a ni.

Mei zu man
Aizawl leh Lunglei district-a Anti Tobacco Squad-te chuan, nimin khan Aizawl leh Lunglei khawpuiah office hrang hrangah phal lohna hmuna mei zu an awm leh awm loh an enfiah a; Aizawlah phal lohna hmuna mei zu mi 15 an man a, Lungleiah mi pathum an man bawk.

Kawng tlawh
AH&Vety minister C Ngunlianchunga chuan, nimin khan Lawngtlai bul Tuiphal zaua Agriculture link road laih thar a tlawh. Agriculture link road hi km 4 vela thui a ni a, Rs. 15,00,000 senga laih a ni.

Ph.d hmu
Zothanpuii chuan Mizoram University aṭangin doctorate degree a hmu a, a thesis chu 'History of Health Care in Mizoram : Pre Colonial Period to 1972' tih a ni.