Kawng siamah Saipum YMA lawm lo

Saipum branch YMA chuan thu­chhuah siamin, Serkhan - Bagha kawng siam hna kal meka ABCI-in Saipum khaw chhunga black topping an tih chu a chhe hle a, hmun ṭhenkhatah chuan ni khat pawh daih loin a khawk chhe leh nghal niin an tarlang.

Saipum YMA chuan, December 2014 aṭangin an khaw chhungah kawng­pui blacktop hna thawh a ni a, lawmawm an tih thu an sawi a; mahse an khaw chhunga blacktop tawhte chuan kum khat chu sawi loh, ni khat pawh a daih lo nia sawiin, "A khawk leh nghal a, a khawk lo lai pawh a lung ṭhil deuh vek nghal. Blacktop nana rora sín an hmante hi a khawh nasat avangin hmun ṭhenkhatah chuan hûi khawmin, 407 truck-in an thiar khawm leh ṭhin a ni," an ti.

Saipum YMA chuan, ABCI-te'n ni khat daih pawh kawng an siam ṭha thei lo chu an dem thu an tarlang a, ABCI hnathawh chu PWD hotute'n a rang lamin a hmunah endik se an duh thu an sawi bawk.