Zu lei phal dilna hralh chhuak mek

Mizoram Liquor Prohibition Control (MLPC) Act dan hman a nih huna zu lei theihna tur permit chu district tina Excise & Narcotics department office aṭangin hralh chhuah mek a ni a, nimin thleng khan permit dilna form la chhuak mi 833 an awm tawh.

Zu buaipui tur hian MIFCO bakah cor­po­ration dangte pawh hman an ni dawn a, warehouse pawh Mizo­ram­ah pahnih awm tura ruahman a nih tur thu, Home minister R Lalzirliana'n a lo sawi tawh a ni.

Chief minister Lal Thanhawla chuan, corporation intodelh lote chu zu lak luh leh hralh buaipui tura hman an nih tur thu Vanglaini a lo hrilh tawh bawk.

Zu zawrhna hmun Aizawla hmun pali-ah siam a ni dawn a, Lungleiah pahnih leh district dang zawngah pakhat ṭheuh ruahman a ni.

Zu lei phalna dilna form hi Rs. 10 zela hralh chhuah a ni a, MLPC Rules pawh peihfel a ni tawh a, liquor card chu press-ah chhuttir mek a ni. MLPC Act leh Rules chu tun thla chhunga hman theih tura ruahman a nih tur thu, thu dawnna chuan a sawi.

MLPC Act leh Rules hi www.excise.mizoram.in.govt ah a duh tan zir chian theih a ni.