Krismas vuakvetah lirthei chesual a tlem
Krismas leh kum thar vuakvet, December 24, 2014 leh January 1, 2015 inkar khan Aizawlah lirtheia chetsualna vawi 26 a thleng a, mi pakhatin nunna a chan phah.
December 24, 2014 leh January 1, 2015 inkara lirthei chetsualnaah hian hmeichhe pakhat a thi a, mi 19 an hliam. Hliam zinga mi 11 chu an na deuh hlek a, pariat erawh an na lutuk lo. Hliam zinga 13 hi mipa an ni a, hmeichhia paruk an ni.
Chetsual chhan tam ber chu fimkhur loh vang a ni a, fimkhur tâwk loh vangin lirthei chetsualna vawi 13 a thleng.
Zu ruih vanga chetsualna vawi kua a thleng a, vanduai vang hrim hrima chetsualna a thleng loa ngaih a ni. Lirthei chetsualna thlengah hian ṭum hnih chu a khalhtuin driving licence an nei lo.
Lirthei che sualte chu - two wheeler vawi 20, LMV vawi 18, taxi vawi li leh city bus vawi khat a ni.
December 24 leh January 1 chhung vêk hian Aizawl khawpuiah traffic police-te'n dan bawhchhia mi 77 an man a, chung zingah pakhatah chuan thubuai ziah luh a ni.
Traffic police-in dan bawhchhia an mante chu - rûi chunga lirthei khalh mi 15, lirthei khalh hlauhawm mi pakhat, driving licence tel loa lirthei khalh mi paruk, thupek zâwm lo mi paruk leh MV ACT Section 177 hnuaia man mi 54-te an ni.
Hetih lai hian, Aizawl Traffic hotute chuan, veng hrangin an veng an cheimawi chuan boruak a tidàia an hriat thu an sawi a; traffic police hotute chuan, "Mipui hlim takin an awm a, an hlim na nâ nâ chuan lirthei pawh an khalh fimkhur a ni. Hei hian chetsualna pawh a thlen tlemtir phahin kan hria," an ti.
Zawhna chhangin traffic hotute chuan, Krismas leh kum thar vuakvetah harsatna lian tham an tawh loh thu sawiin, "Kan harsatna tawh deuh chu veng chei entute lirthei dahna a ni a, traffic police min rawn dil vek a, kan pe daih thei lo. Mahse, veng hrang hrang hian lirthei kal vel buaipuitu tur an inruat a, kan lawm hle," a ti a; kawng dunga mipui punkhawmna buatsaih erawhin lirthei khalhtu tam tak tan harsatna a siama an hriat thu an sawi.