Traffic police-te kum 2014 aia khauh leh tha zawka kal an tum

Aizawl Traffic SP Lallianmawia chuan, Aizawl khawpuia lirthei tâwt lutuk a ziaawm theih nan kuminah ṭha zawk leh khauh zawka kal an tum thu a sawi.

Vanglaini palai zawhna chhangin Lallianmawia chuan, "Kuminah hian nikum aia a ṭha zawnga changkan kan tum. Mipui rawngbawltu kan nih angin, mipui tan a ṭha thei ang bera thawh kan tum a, ṭawngkam leh chetzia thleng pawhin mipui rawngbawltu kan nihna lantir deuh deuh kan duh a ni," a ti.

Lallianmawia sawi danin, traffic police-te'n mithiamte ráwnin, tuna mipui tana Aizawl khawpui him, traffic tana ṭha si siam a nih theihna atan theihtawp chhuah an tum a ni.

Traffic hotute chuan, nu leh pa tam takin an fate driving licence nei loa lirthei an khalh chhuahtir ṭhin thu sawiin, driving licence nei lo an nih chuan an fate lirthei khalh­tir lo turin nu leh pate an ngen.

Traffic SP sawi danin, driving licence nei loa lirthei khalh man an nih chuan lirthei khalhtuin Rs. 500 leh lirthei khalhtirtuin Rs. 1,000 an chawi a ngai a ni.

Traffic police chhinchhiah dan­in, nikum Krismas bazar rûnpui lai khan Israel Point-a traffic police-te'n hrui hmanga mipui an danaah minute khat chhungin mi 90 velin kawng an kân a, Bazar Bungkawnah minute khatah vêk mi 95 velin kawng hi an kân ṭhin bawk.