TZP-in conference an hmang

Tuipuiral Zirlai Pawl (TZP) chuan nimin khan Sesih community hall-ah general conference an hmang a, parliamentary secretary TT Zothansanga'n a hmanpui.

TT Zothansanga chuan, tunlai khawvela information technology lama hmasawnna chu awlsamna leh remchanna siamtu a nih laiin, a ṭha lo zawnga ṭhalaite kaihruai thei a ni tih hre turin zirlaite a fuih a, "Hlawhtlin tuma taima taka bei hram hramtute chuan malsawmna leh hlawhtlinna an hmu ṭhin tih hriatreng a pawimawh a ni," a ti. Tuipuiral chhunga kawng ṭhenkhat, Champhai leh Khawbung inkar leh Khawbung leh Biate inkarte siamṭhatna tur sum ruahman fel a nih tawh thu a sawi bawk.

Parliamentary Secretary (Supply) chuan above poverty line (APL) tana buhfai man kg. 1 Rs. 15 a tihsan chungchang sawiin, "Heti chung pawh hian sorkarin subsidy atan buhfai kg khat zelah Rs. 15 vel a hmang a ni. Ṭhenawm state-te chuan ration buhfai an lak nasa takin an titlem a, chutiang bawk chuan Mizoram sorkar pawhin hma lak ve a tum a ni," a ti.

TZP conference-ah hian an huam chhunga HSLC leh HSSLC exam-a pass kim vek sikul pariat leh zirlai ti ṭhate hnenah chawimawina an hlan a ni.