Vote thlaktute an him ngei theih nan Ruahmanna siam turin SEC an phût

Zoram Peoples' Movement (ZPM) party chuan thuchhuah siamin, Mizorama village council leh local council inthlanah vote thlaktute himna ngei tur ruahmanna siam turin State Election Commission (SEC) an phût tih an tarlang.

ZPM chuan, August 27-a LC/VC inthlan kan nei tur hi Covid-19 hripuiin min luhchilh lai, ei bar zawn ṭul leh mamawh zual lam tur pawha páwn kan chhuah ṭhat ngam mang loh lai leh campaign pawh rilru inhawng taka kan welcome ṭhat chiah loh lai a ni a, kum upa leh hriselna lama harsatna tâwkte tan phei chuan huphurhawm hle dawnin a lang," an ti a; chuvang chuan vote tla a tlem phah ngei a rinawm thu an sawi.

Inthlan kaltlangpui a nih dawn chuan Election Commission of India-in voter-te himna tura a duan, August 21, 2020-a tihchhuah ang taka ruahmanna siam turin SEC an phût a, "Vote thlaktute himna tur ngaihtuah se la, kutkawr him leh hmai khuhna a thlâwna hman theih tur leh kut sil faina tur sahbawn leh tui thianghlimte polling area-ah chhawpin, hmunhmate kap thianghlim ngei se. Ballot paper leh a chhutna seal pawh voter-te tana him ngei tura buatsaih turin kan ngen a ni," an ti.

ZPM chuan, "Khua leh tuite'n kan mawhphurhna hlen chhuak a, vote kan thlakna turah mi tinte'n ngaihṭha taka vote kan thlak theih nan Mizoram sorkar hian vote thlaktute'n vote an thlak avang­in hri an kai phah dawn lo a ni tih puang chiang se. Vote thlak vanga hri kai palh an awm a nih chuan, a chhawmdawl dan turte pawh puang chiang ngei se kan duh," an ti bawk.