Buhfaiah harsatna a awm lo ang - Rajya Sabha MP

State Level Consultative Committee (SLCC) of Food Corporation of India chairman, Ronald Sapa Tlau, Rajya Sabha MP chuan, harsatna eng emaw a thlen thulha Mizoramin buhfaiah harsatna a tawh loh turin ruahmanna an siam thu a sawi a, "Rel kawng siam vanga mega block hian harsatna a thlen lo ang," a ti.

State Level Consultative Com­mittee, FCI member-te chuan nimin khan Hotel Regency-ah thuthar thehdarhtute an kâwm a, an hmalakna hrang hrang leh an hmachhawpte an sawifiah.
Ronald Sapa Tlau chuan, kawng chhia, kawngpui danchah leh thil danga vanga harsatna a awm pawhin, Mizo mipuite'n buhfaiah harsatna an tawh lohna atan ruahmanna chi hnih an siam lâwk thu sawi.
Ruahmanna an siamte chu - Myanmar aṭanga buhfai lak luh a ngaih pawhin, Zokhawthar aṭanga phurh darh dan tur enfel a ni tawh a; Andhra Pradesh aṭanga lawng hmanga Bangladesh-a buhfai phurh luh a, Bangladesh aṭanga Tripura, Tripura aṭanga Mizorama phurh luh theih dan tur ruahman a ni bawk.
Mega block vanga harsatna awm tura ngai an awm chung­changah Ronald Sapa chuan, "FCI hotute'n mega block vanga harsatna a awm loh tur thu ziakin min tiam a ni. Mega block a awm vang hian FCI lamin Mizoram leh Tripura an ngai pawimawh hle," a ti a; harsatna a awm lohna atan mutmu tuah loa ṭan an lak tur thu a sawi.
SLCC, FCI Chairman chuan, quality control lam an uluk dawn tih sawiin, "Tun hma deuh chuan retailer buhfai sem a chhe hle a, tlema neinung deuh phei chuan an ei duh ṭhin lo. Tunah chuan buhfai quality pawh a ṭha sâwt hle a ni," a ti.
Buhfai tihchingpen chung­changah Ronald Sapa Tlau chuan, "FCI lamin ṭan an la a, thil dik lo titu an hriat chhuahte chu an hrem zel. Rela buhfai bothlau chu FCI mawhphurhna a ni a, truck-a dah a ni tawh chuan supplier mawhphurhna a ni thung. Truck-a buhfai a chingpen chuan quintal khat chingpenah supplier-in quintal hnih an chawi a ngai," a ti. FCI lamin an kudamah buhfai dah khat zung zung mah se, Supply department lamin an lak chhuah chak loh chuan awmzia a awm loh thu sawiin, "Department lam nen kan thawhdun ṭhat a pawimawh hle," a ti.
Ronald Sapa sawi danin, January 1, 2015 khan Mizorama FCI kudamah buhfai leh wheat metric ton 25,939 a awm a, chu chu kudama leng zat anga ngaih metric ton 25,490 aiin a tam a ni.
Ronald Sapa ṭawiawmtu, FCS&CA secretary R Lalvena chuan, Supply kudam tam tak chu a chhiat tawh avangin buhfai an dah ṭhat ngam loh thu a sawi a, "NABARD aṭangin pawisa kan hmu a, kudam chei ṭhat ngaite kan chei bakah, a thar pawh kan sa ang," a ti.
R Lalvena chuan, Supply kudam aṭanga buhfai lak chhuah zung zung a buaithlak thu sawiin, "Pawisa pek lâwk loh chuan lâk chhuah an phal lo. Pawisa hi Finance department kaltlanga tihkual vek a ngaih avangin hun a duh rei ṭhin a ni," a ti a; a báa lâk lâwk an dil pawhin FCI lamin an phal loh thu a sawi.
Ronald Sapa Tlau hi Supply Secretary bakah hian FCI North East Frontier Region leh Mizorama FCI hotute'n an
ṭawiawm a ni.
Press conference an koh hma hian State Level Consultative Committee FCI hi an ṭhu­khawm a, Ramrikawna FCI kudam thlakna atan Sairangah metric ton 10,000 leng sa tura ruahmanna kalpui mek a nih thu sawi lan a ni.