Covid-19 darh zel lohna tura ṭulte rel
Lunglei District Level Task Force on Covid-19 chu August 21 khan an chairman, DC V Lalsangliana hoin DC conference hall-ah an ṭhukhawm a, Covid-19 hrileng a darh zel lohna tura thil ṭulte an rel.
V Lalsangliana chuan Covid-19 hrileng do kawngah sawrkar leh VLTF-chuan tha thlah loin theitawp an chhuah chhunzawm zel dawn tih sawiin, "Mipuite pawhin he hri laka invenna kawnga tih tur leh tih loh tur te fimkhur taka kan zawm zel a ṭul a ni. Kan hma lawka VC election lo awm turah pawh sorkarin inkaihhruaina SOP a tih chhuah uluk taka zawm tur a ni. Covid-19 hian engtik thleng nge a awh dawn a hriat loh a, kan hnaivai maia awm Mizoramah pawh a pun zel avangin mitinte kan fimkhur lehzual a ṭul tak zet," a ti.
Meeting-a thurelte :
Tunhnaiah Aizawla veng ṭhenkhatah Covid-19 positive hmuhchhuah thar an awm a, heng hmun/venga Lunglei district chhunga mi kal an awm chuan mahni veng VLTF te kaltlangin contact tracing team-te hnenah in report tur a ni . Tuna positive hmuhchhuahna veng ni lo khua/veng dangah positive hmuhchhuah thar an awm pawhin chumi hmuna kalte chuan a chunga sawi ang khian in report zel tur a ni. Contact Tracing Team-te hnena in report-na tur mobile number chu 6033151202, 8413844758, 8014754337, 7760159282, 8014127112 a ni.
Mizoram sorkarin inkaihhruaina (SOP) a siam anga infiamna hmun, lumehna dawr, sam siamna hmun, spa, etc.-a lut leh chhuakte an hming, address leh contact number-te chhinchhiah zel tur tih a nih bakah dawr zawng zawngah dawrtu (customer) te hming, address leh contact number-te chhinchhiah vek tur a ni. Customer-te'n anmahnia ziak loin dawrneituin an lo chhinchhiah zel tur a ni.
Covid-19 positive te contact neih palh hlauhthawnawmna hmuna thawkte chuan mobile number 6033151202, 8413844758, 8014754337, 7760159282, 8014127112 ah in report tur a ni.
Tunlaiin khua/hmundangah Covid-19 positive hmuhchhuah a nih avangin loh theih loh a nih loh chuan zin veivak lo turin mipuite kan inngen. Positive hmuhna khuaa zin tur kan awm a nih chuan mahni awmna veng VLTF hnenah in report hmasak zel tur a ni.