2015 tìra sorkar thuchah hmasa - Buhfai man tihsan: Zoramthanga

MNF chuan nimin khan an party office, Mizo Hnam Rûn chu kum 2015 atana hawnna inkhawm an hmang a, MNF president Zo­ram­thanga'n thu sawiin, kum 2015 tìr aṭanga Congress sorkarin mipui hnena an thuchah hmasa chu - buhfai man tihsan leh zu permit dilna form Rs. 20-a hralhte a nih thu a sawi.

MNF president chuan, sorkar sum dinhmun a chhe hle nia sawiin, "Pathianin naktuk atan sorkarna kan kutah dah dawn ta se, kum khat dang la sorkartir rih rawh, tunah chuan sorkarna kan keng ngam rih lo ka ti ang," a ti a; sorkar leiba chu a rapthlak em avangin leiba tam lutuk rochun ringawt chu an zuam rih loh thu sawiin, "Châk vang ringawta CM ṭhutthleng luah ngam a ni lo, kum 1998 khan an sum báwm ruak kan rochun tawh a, kan ṭawngṭaina Pathianin a chháng a, peace bonus hming phuahin vbc. 182 min pe a, sum harsatna kan siam rem thei hram a ni," a ti.

Zoramthanga chuan, kum thara Congress sorkara thâwm thar ber leh mipuite hnena an thuchah hmasak chu - buhfai kg. khat man Rs. 9.50 aṭanga Rs. 15-a tihsan leh, zu permit dilna form Rs. 20-a hralhte a nih thu a sawi a, "An sum siam tum dan hian sorkar sum harsatna a sukiang pha dawn lo," a ti a; Mizoram chuan Central sorkar enkawlna hnuaia awm a hlat lo niin a sawi.

NLUP chungchang sawiin, Zoramthanga chuan, "Sazuk ki mawi tak pakhat, a inchhuanna ber a ki hrêu hnawk kara a tàn hlumpui ang a ni. An hman dan leh an sem dan Central-in a rawn hriat chian hunah chuan scam lian tak a tling lo ang tih a sawi theih loh," a ti a; NLUP ṭanpuina dawng anga tarlan, a taka dawng si lo tam tak an awm niin a sawi.

Zoramthanga chuan MNF party mipuite chu kum thar a nih angin rilru thar nen, theihtawp chhuaha ṭan la turin a fuih a, unit aṭanga general headquarters thlenga an party-a nihna neite chu an hmaa tih tur awmte hlenchhuah kawngah ṭan la lehzual turin a chah.

MNF president chuan, VC, LC, district council, MLA leh MP inthlanahte candidate mi duhawm tak tak an thlang tih a sawi a, "A siamtu party hre chang loa mahni kal kala kalte chu an tlo lo a, party ràwn nachang hre lote chu a hnu leh atan dah nawn an har duh ṭhin a, an tling zui duh lo. Hei hi political party tinin, ‘Party-a chhum hmin loh,’ tih ṭawngkam kan hman fo chhan a ni," a ti.