Lei chim dawh ṭhat hna thawk mek

Sihhmui leh Lengpui inkara Tlawng lei chim chu dawh ṭhat leh mek a ni a, dawh zawh hun tur erawh sawi theih a la ni lo. Lei ruhrel thîr ft. 60-a sei rem khawm tawh a ni a, lei chu ft. 200-a sei a nih avangin, ft. 140 rem khawm a la ngai a ni.

PWD Highway Division-I hotute sawi danin, Tlawng lei dawh hna hi Krismas leh kum thar chawlh lai pawhin an chawl ve lo a, ngawrh taka hna thawh chhunzawm zel a ni. Department-a thawktu mi pariat leh páwn lam mi pariatte'n hna an thawk mek a, zing ni chhuah aṭanga ni tlak thleng an thawk ṭhin a ni.

Tunlai hian lei chim tawh an ṭhiat mek a, lei chim chu a kâwi laia kah bun a nih hnuah a khai chhuahna khawl lian (crane) hmangin lui kam, tui chîm loh chinah hnuh chhuaha ṭhiah zel a ni. Lei dawh ṭhatna atana mamawh tâwk pannel, chord re-enforcement, transom clamp leh lei chhuata thir phek phah chi decking-te an la khawm ngah ṭep tawh a ni.

Sihhmui-Lengpui inkara lei a hman theih rih loh avangin Mamit district leh Lengpui Airport-a kal turte chuan Buichali lei amn zawh vek a; he kawng hi a zauh tawh loh vang leh khuar a tam avangin kal a buaithlak hle niin an sawi.

Hetih lai hian, Chhimtuipui luia Darzokai lei dawh mek chim pawh dawh ṭha turin contractor, S Guha Niyogi chuan a buaipui mek. PWD hotute sawi danin, lei chim ta chu ṭhiah mek a ni a, lei chhuat phah, thing phelte chu lak khawm zawh tawh a ni. He lei chim chungchangah hian police-ah FIR thehluh a nih avangin Hnahthial police-te'n an chhui mek bawk.