PUC-in sangha chi thar an hmu chhuak

Pachhunga University College-a Department of Zoology-te chuan Phulpui khaw lui, Tuirivâng-ah khaw­vela science zirnain a la hmelhriat ngai loh sangha, 'Dàwnṭial' chi khat an hmu chhuak.

PUC Zoology depart­ment-a assistant professor, Lalramliana tarlan danin, PUC-in Phulpui khua chu an khaw chuam (adopted village)-a an puan angin, kawng hrang hrangin Phulpui khua an zir chiang a; Zoology department-a zirtirtute leh zirlaite chuan Tuirivang luiah Dàwnṭial chi thar hmuchhuakin, a hmingah Mizoram chawiin 'Schistura Mizoramensis' an vuah.

He sangha chi thar chanchin zirchianna chu khawvel huapa sangha chanchin chhuahtu, Ichthyological Exploration of Freshwaters-in pawm­puiin, khawvel hriatah a puangzar ta a ni.

PUC Zoology depart­ment chuan, khawvelah Dàwnṭial sangha chi hrang a tam hle tih tarlangin, Mizoram chhungah pawh a chi hrang 10 aia tam awma hriat a nih thu an sawi a; Tuirivang luia Dàwnṭial an hmuh chhuah thar chu a mawi danglam hle nia sawiin, "Aquarium-a khawi atan pawh mawi tak a ni. Dàwnṭial dangte aia a danglam bikna chu, a pang sirah a dumin dung rìn fiah tak a awm a, a pang leh a dung rìn inzawmkhawm karah a taksaah ‘spot’ var ang takin a awm thliah a ni," an ti. Phulpui khaw mipuite'n an khaw rama ramngaw leh luia nungchate an humhalh ṭha hle niin an tarlang bawk.