Minister-in Tuipuiral Sports Meet hawng

Nimin khan Farkawn khelmualah Tuipuiral Annual Sports Meet vawi 42-na ṭan a ni a, Sports minister Zodintluanga'n a hawng. Meet-ah hian khaw 13 an tel a ni.

Minister Zodintluanga chuan, Mizoram khaw chhak lam leh Tuipuirala khuate chu infiamna lamah an chhuanawm hle tih sawiin, "Mizoramin Santosh Trophy a lakna kawngah Tuipuiral tlangval an thawhhlâwk hle a ni," a ti a; infiammite chu Mizoram chawisang tura taimakna leh insumtheihna nen theihna an nei tih a hrilh.

Zodintluanga chuan, ṭhalaite theihna pho chhuahna kawngah Tuipuiral Games & Sport Association hruaitute'n theihtawp an chhuaha a hriat thu sawiinṭhalaite chu hruaitute thu leh hla ngaichânga zah turin a fuih a; Tuipuiralah thâ leh theihna a awm tih sawiin, Farkawnah mini sports complex sak a nih theih nan hmalak a nih tur thu a sawi.

Sports Minister chuan, PHE changtu minister a nihna angin Tuipuirala PHE hmalakna kal mekte a sawi a; Saikhumphai tui tlan tur lak nan cheng nuai 61, Vaphai tui tlan tur lak nan cheng nuai 69 leh, Ṭhekpui tui tlan tur lak nan cheng nuai 60 pek chhuah tawh a nih thu a sawi. Farkawn tui tlan tur lak nan cheng nuai 181, Lianpui khaw tui tlan tur lak nan cheng nuai nuai 99, New Hruaikawn tui tlan tur lak nan cheng nuai nuai 111 leh, Khuangleng tui tlan tur lak nan cheng nuai 23 hu project siam tawh a nih thu a sawi bawk.

Tuipuiral Annual Sports Meet hi kum 1974-ah neih ṭan a ni a, tun ṭumah hian football leh volleyball hmangin an inel dawn a ni. Football-ah khaw 13 aṭangin team 14 an chhuak a, volleyball-ah team 11 an tel bawk. Tuipuiral GSA chhungah hian khaw 27 an awm a ni.