PAC nihna leh hnathawh sawifiah; Ram tan kan lungrual - PAC Chairman

Mizoram State Legislative Assembly hnuaia Public Accounts Committee (PAC) member-te chuan nimin khan Assembly Secretariat-ah thuthar thehdarhtute an kâwm a, PAC nihphung leh hnathawh ṭhin an sawifiah. PAC chairman Lalchhandama Ralte chuan, political party hrang hrang awm khawm ni mah se, ram leh hnam thilah an inlungrual ṭhin thu a sawi.

Lalchhandama Ralte chuan, Assembly House-ah chuan political party hrang hrangte thu inhmuh loh leh inhnial châng a awm ṭhin tih sawi a, "Ram leh hnam tana ṭha turah chuan lungrual takin kan thawkho thung. PAC member lo ni tawhte leh tuna mite pawhin Committee-ah party kan ngaihtuah lo a, mipui min thlan angin kan ram tan theihtawp kan chhuah ṭhin," a ti.

PAC Chairman sawi danin, PAC chairman atan eptu lam leader an awm ṭhin a, member paruk zinga pali chu ruling party an ni ṭhin thung.

PAC member-te chuan, India rama parliamentary democracy-ah Assembly committee-te'n hmun pawimawh tak an chang tih sawiin, "Indian Parliament-ah committee hrang hrang a awm laiin, state-tinah Assembly committee kan awm. Committee-te chuan Assembly aiawhin Assembly-in a tih tur hrang hrang chanvo leh thiltihtheihnate chu Rules of Procedure and Conduct of Business hmangin a hlan chhawng," an ti a; Rules of Procedure and Conduct of Business chu India Danpuia Article 208 hnuaia Assembly-in a siam a nih thu an sawi.

Assembly committee-te chu Assembly aiawha Assembly chanvo hrang hrang hlentu an nih angin session loh laia ṭhukhawm ṭhin ni mah se, 'Assembly In Session' anga ngaih a nih thu sawiin PAC member-te chuan, "India Danpui Article 194 hnuaia kan neihte leh a dangte pawh Assembly committee koh a nih chhungin a nung reng. Member-te leh Assembly official-te duty hlen tur hi tihbuai a thiang lo," an ti.

PAC member-te chuan, committee hrang hrangte zinga upa ber chu PAC a nih thu sawiin, "Parliament-ah chuan Government of India Act, 1919 behchhana din a ni. Mizoramah pawh UT hun lai aṭangin he committee zahawm tak hi a awm tawh," an ti a; state nih hnuah pawh Assembly-in Rules of Procedure and Conduct of Business hmangin PAC a din nghal thu an sawi.

PAC member-te sawi danin, PAC hian mi hrem theihna a nei lo a, hrem tura rawtna a thlen thei thung. Hriat fiah duh an neihin official-te leh minister thlengin an ko thei. Official an kohin secretary a kal tur a ni a, eng emaw vanga a hman loh chuan aiawh tirh a dil tur a ni. Thu an tiam hnuah video coverage hnuaiah zawhna zawh ṭhin a ni a, thu dik lo an sawi chuan contempt of court anga ngaih niin, an chunga action lak tur a ni.