Adviser to CM dan kalha ruat an ni - PC: Hma la turin Governor leh ZPM VUC an ngen

People's Conference (PC) party chuan ZPM sorkar chu India Constitution Article 164 (1A) bawhchhiaa an party an mi leh sate adviser to chief minister nihna peah an puh a; chu'ng mite chu bàn an nih theih nan hma la tura ngenna Governor leh ZPM Val Upa Council-ah an thlen.

PC party president Vanlalruata chuan, ZPM sorkarin Constitution Article 164(1A) bawh­chhiain MLA leh an party mite minister of state tlukpui nihna leh hamṭhatna an pe tih a sawi a, "Kum 2003-a India Danpui siamṭhat a nih khan state hrang hranga minister neih theih zat siam a ni a, Mizoram chuan minister 12 aia tam lo kan nei thei. Tuna minister of state tlukpui Adviser to CM panga kan neih avang hian mipui sum sèn ral tur hi cheng nuai 845 chuanga chhût a ni," a ti.

Mipui sum khawhralna leh India Danpui kalha chetna chu tihtawp nghal a ṭul avangin Governor leh ZPM VUC hnenah hma la turin an thlen tih sawiin Vanlalruata chuan, "Mipuiin kan ngaimawh mai ni loin, Supreme Court leh High Court-te'n an ngaimawh hle. Goa, Haryana, Telangana, West Bengal, Punjab leh Assam-a hetiang kalphung phuahchawp hmanga parliamentary secretary ruatte pawh Court-in a paihtir vek a ni," a ti a; Mizoram sorkara kum 2008-a parliamentary secretary pasarih ruatte pawh bàntir an nih thu a sawi.

Thuthar thehdarhtute zawhna chhangin Vanlal­ruata chuan, MNF sorkar laia SEDP board hrang hrang chairman-te chu minister of state tlukpui (rank)-ah dah ni mah se, minister of state ham­ṭhatna ang pek an nih ve loh avangin dan bawh­chhiat a awma an hriat loh thu a sawi a, "Tuna adviser to CM pangate hian minister of state rank an nei ni satliah loin, portfolio an nei a, depart­ment chanpual an neih aṭang chiah khan minister an ni ta chiah. Minister of state angin office, staff, motor leh allowance hran pek an ni a, file an khawih bawk," a ti.

PC President chuan, Mizoramin minister 12 aia tam a neih theih loh laia minister hamṭhatna nei mi panga ZPM sorkarin a ruat belh avangin Mizoramin minister 17 a neih thu leh chu chu dan bawhchhiatna a nih thu a sawi bawk.