Remna Ni lawmnaa thu dik lo sawiah MNF party-in Chief Minister an puh

MNF Media & Publicity department chuan nimin khan Aizawl Press Club-ah thuthar thehdarhtute an kâwm a; chief minister Lalduhoma chu June 28, 2024-a MZP huaihawt Remna Ni lawmnaa thu dik lo sawiah an puh.

MNF Media general secretary VL Krosshnehzova chuan, 'India sorkar ruahmannain August 15, 1975 khan Pu Laldenga te chu Pakistan aṭangin rûk chhuah an ni a, Geneva-ah an kal,' tiin CM Lalduhoma'n a sawi niin a sawi a, "Pu Laldenga staff-te leh India sorkar aiawhte hi foreign-ah vawi tam tak a hmain an inbe tawh. Chumi kal zelah India sorkarin Pu Laldenga ngei hi biak an duh ve tawh avangin August 15, 1975-ah Pi Lalbiakdiki leh Pu Zoramthanga te nen Karachi aṭangin Beirut, Istanbul kaltlangin Geneva an thleng a, India sorkar nen an inbe ta a ni. Engti kawng mahin rûk chhuah an ni lo," a ti.

VL Krosshnehzova chuan, CM Lalduhoma'n, 'Chumi zûlzui chuan India sorkar leh MNF-te'n remna thuthlung hmasa zawk an sign ta a. July 1, 1976-ah Shillong-ah an sign a, hei hi Shillong Accord kan tih ṭhin kha a ni. Hetih lai hian kan chief minister Pu Ch Chhunga nen Shillong-ah kan awm ve reng a ni,' tiin a sawi tih a tarlang a, "Hei hi dâwt chiang tak a ni," tiin, MNF leh India sorkarin Shillong-ah Shillong Accord an ziak lo niin a sawi.

Lalduhoma'n, 'Chutih lai chuan CM Pu Ch Chhunga nen Shillong-ah kan awm ve reng a ni' a tih phei chu dâwt chiang lehzual niin Krosshnehzova chuan a sawi a, "July 1, 1976-ah India sorkar leh MNF-te chuan inbiakna chhunzawm zelna tura tih tur ṭulte sawiin joint press statement Delhi-ah an siam a ni. Engtik lai mahin India sorkar leh MNF-te hian Shillong-ah inremna an siam lo," a ti.

MNF Media & Publicity hotute chuan, Lalduhoma'n remna thuthlung ziah a nih chungchang leh remna kawng India leh MNF-in an zawh lai chanchinah thu leh hla eng emaw zat a puangzar tawh tih sawiin, "A pawl awmna a sawn apiangin a thusawi a dang zel tih theih deuh thawin thu a ngah. A eng ber nge rin tur hriat har tak tak a ni hlawm," an ti a; finfiah harsa tawh thilah awihawm deuhin dâwt a sawi fo niin an sawi.

Tun hma lama Lalduhoma thusawi chu mi pakhat thusawiah an ngaih mai theih thu sawiin MNF Media chuan, "Tunah chuan Mizoram sorkar lu berah a ṭhu tawh a, thu dik lo sawi a rem tawh loah kan ngai. Remna Ni lawmnaa zirlai tam tak hmaa dâwt a sawi mai khan, a sawi awihtute'n thil dik lo kha thu dik emaw tiin an hriat reng a hlauhawm a ni," an ti.