Kudama kuhva rah bo zawn zui zel a ni
Vairengte SDPO chuan Kolasib SP hnenah July 8, Thawhṭanni khan lehkha thawnin, Vairengte leh a chhehvel kudam aṭanga kuhva rah bote ngawrh taka zawn zui zel a nih thu a tarlang.
Vairengte SDPO tarlan danin, June 24-25, 2024 khan Vairengte leh Phaisen huam chhunga Myanmar kuhva an hmuh chhuahte chu July 2, 2024 khan enfiah leh a ni a, eng emaw zat a lo bo tawh. Myanmar kuhva, a neitute'n police man an hlauh vanga an lo chhehrelhte chu ngawrh taka zawn chhuah leh tum mek a ni.
Hetih lai hian, kudam pakhat hmuh chhuah belh a ni a, chutah chuan kuhva ip 2,000 chuang hmuh chhuah a ni. Kuhva neitu chu Raj-a tih a ni a, kudam neitu chu Malsawma s/o K Kailiana, Vairengte Zalen Veng a ni.
Kudam chhunga kuhva awmte chu kum li vel awm tawh a ni a, tun hnaiah an khawih che vak lo nia hriat a ni. Kudam hi thla khatah Rs 25,000-in an luah.
Lalengzauva s/o H Rohmingliana (L), Vairengte kudam, IOC Veng aṭanga chhehrelh nia hriat kuhva ip 350 hmuh chhuah a ni bawk. Kuhva chu Lalthlamuani w/o David Zothanpuia, Vairengte Kawngthar Veng ta nia hriat a ni. Kudam chu tala hmanga kalhin nghal a ni.