CM-in Union minister-te a kâwm

Chief minister Lalduhoma chuan July 8, Thawh­ṭanni khan New Delhi-ah Union Health minister JP Nadda leh Union Road, Transport and Highways minister Nitin Gadkari te an chenna in ve veah a kâwm a; nimin khan DoNER minister Jyotiraditya Scindia leh Environment, Forest and Climate Change minister of state Bhupender Yadav a kâwm bawk.

Union Health Minister a hmuhnaah Chief Minister chuan, Zoram Medical College (ZMC) tihchangtlunna tur sum pe tura Delhi a zin hmasak ṭuma a lo dil tawh chu chungchangah JP Nadda chuan tihfel vat a nih tur thu a sawi. ZMC-a Critical Care Block din chungchang chu an lo zir chian tur thu leh chanchin a hriattir leh vat tur thu CM a hrilh bawk. Chief Minister hi minister Vanlalhlana'n a ṭawiawm a ni.

CM Lalduhoma leh PWD minister Vanlalhlana te chuan Union Road, Transport and Highways minister Nitin Gadkari pawh a chenna inah Mizorama project hrang hrang leh harsatnate an sawipui.

Sorkar thuchhuah tarlan danin, Nitin Gadkari chuan, Mizorama hnathawh tur hrang hrangah forest clearance chu an mutàn ber a nih thu a sawi a, "Mizorama hna kan thawh mai theih loh ṭhin chhan lian ber chu forest clearance fel lo a ni," a ti.

Chief Minister hian NHIDCL-in Mizorama kawng an siamah kawng dâwlna atana retaining wall an siam chim nasa lutuk thlalak eng emaw zat Nitin Gadkari a entir a; Union Minister chuan enfiah nghal a tum thu a sawi.

Nitin gadkari chuan, Mizoram sorkarin Aizawl Bypass Tunnel Approach Road siamna tur a thlen tawh leh Lawngtlai-Siaha inkara Chhimtuipui lui (Tuipui Ferry)-a lei dawhna tur DPR a thehluh tawh pawh a rang thei ang bera tihhlawhtlin dan a zawn tur thu a lo hrilh bawk.

CM Lalduhoma chuan nimin chawhma khan Development of North Eastern Region (DoNER) minister Jyotiraditya Scindia chu a pisaah a hmu a; North Eastern Council thuneihna tihpun chungchang leh project hrang hrang chungchang an sawi dun.

Jyotiraditya Scindia chuan, DoNER hnuaia project hrang hrang enfiah turin Mizoram a tlawh vat tur thu leh, Kaladan Multi-Modal Transit Transports Project chu a hmunah ngei a tlawh a tum thu a sawi tih sorkar thuchhuahin a tarlang.

Nimin chawhnu khan Chief Minister chuan Environment, Forest and Climate Change minister of state Bhupender Yadav pawh a pisaah a hmu bawk. Mizorama project hrang hranga forest clearance hmuh theih loh vanga harsatna awmte leh a chinfel dan turte an sawi dun a; Bhupender Yadav chuan, harsatna awmte chu chinfelpui vat a tum thu a sawi.

CM Lalduhoma chuan, forest clearance hmuh loh chungchanga Mizoramin a tih tur la awmahte hmalakna chak zawk a awm theih nan ṭhutkhawm koh vat a tum thu a sawi bawk.