April 2019 - June 2024 inkarah naupang rûkbo thubuai 23 ziak lut
Nimin khan Serchhip DC conference hall-ah kum tling lote hna thawka chhawr (child adolescent labour) leh sumdawna atana naupang rûkbo (child trafficking) chungchang zirhona buatsaih a ni a, bawrhsap Paul L Khuma'n a hmanpui. Mizoramah April 2019 leh June 2024 inkarah naupang rûkbo thubuai 23 ziah luh a nih thu tarlan a ni.
Zirhonaa tarlan danin, sumdawna atana mihring rûkbona (human trafficking) chu khawvela thilsual tih hluar ber dawttu a ni a, human trafficking zinga 27% chu child trafficking a ni. Mizoramah chuan April 2019 - June 2024 chhungin child trafficking thubuai 23 ziah luh a ni a, a tuartute chu hmeichhia 10 leh mipa 13 an ni. Serchhip district bikah child trafficking thubuai a la awm lo.
Serchhip DC chuan, dan kalha kum tling lo hna thawka chhawr luih leh naupang hralha sumdawn chungchangah Serchhip district a la fihlim chu lawmawm a tih thu a sawi a, "Hetiang thil hi kan chungah leh kan khawtlangah a thlen ve lohna tura ṭan kan lak a ṭul a, zirtir chhâwngtu leh pu darhtu ni turin mi tin kan pawimawh," a ti.
Naupang kum tling lo hnathawka chhawr chungchangah tum rêng vang ni lo, hriat lohna vanga dan kalha chhawr an awm thei tih sawiin Bawrhsap chuan, "India ram danin child labour a hrilhfiah leh a khap dan kalphung te, inkaihhruaina leh hremna awm theite kan inzirtir nasat a ngai. Kan rin lohna lam aṭanga inbumna avangin child trafficking tuartu kan lo ni reng thei," a ti a, inzirtirna buatsaih zel tum a nih thu a sawi.
Ṭhutkhawmah hian Serchhipah DC kaihhruai Vigillance Team for Inspection and Monitoring on Prevention of Illegal Transportation of Children din a ni tawh a, July 11-12, 2024 hian Serchhipah child labour leh trafficking a awm leh awm loh an enfiah dawn a ni.
ZIRHONAA TARLANTE
▶ Child and Adolescent Labour (Prohibition and Regulation) Act, 1986-in kum tling lote an taksa leh rilru hriselna atana him lo eizawna hmuna thawka chhawr a khap.
▶ Kum 14 hnuai lamte chu an zirna tibuai zawngin eng hna pawh thawhtir phal a ni lo.
▶ Hna reng reng naupang theihna leh zahawmna hlohtirtu emaw, naupang taksa leh rilru hmasawnna leh ṭhanna dâl theitu emaw, an zirna tibahlahtirtu emaw, zirna chawlhsan ngai khawpa thawh ngai hnate thawhtir khap a ni.
▶ Zan dar 7 aṭanga zing dar 8 inkarah tleirawlte inhlawhfaa chhawr phal a ni lo.
▶ Tleirawlte hriselna atana pawi thei tur te, an nunna atana hlauhawmahte inhlawhfâk khap a ni.
▶ Hna thawka chhawr lui an awm a nih chuan dan anga hrem theih an ni.