National Integration Camp-ah Mizo NCC cadet-te an che ṭha

National cadet Corps (NCC) 20 Mizoram Battalion cadet-te chu June 19-30, 2024 chhunga Srinagar, Jammu & Kashmir-a Special National Integration Camp-ah telin an che ṭha hle a, nimin khan Mizoramah an rawn haw.

Special National Integration Camp-ah hian NCC directorate 17 telin, Mizoram NCC cadet-te chu North Eastern Region directorate aṭangin Silchar Group Hqrs kaihhruainain an tel a, state leh union territory tin aṭangin cadet 300 chuang an tel.

National Integration Camp-ah hian intihsiakna chi hrang hrang neih a ni a; Group Song Competition-ah Mizote telna NER directorate chu pakhatna niin, kaihruaitu chu first officer Lalṭhakimi a ni. Volleyball-ah pakhatna an ni a; malzai (solo)-ah Sgt. R Vanlalrinfeli, Pachhunga University College chu pahnihna a ni bawk.

NCC additional director general (NER) Maj.Gen. Gagan Deep chuan, NCC NER hnuaia cadet-te hlawhtlinna chu a chhuang hle tih sawiin, "Ram pum huapa kan cadet-te hlawh­tlinnate hi an thawhrimna, chhelna leh an commanding officer leh instructor-te kaih­hruaina vang a ni," a ti.